Կանադան եւ ԱՄՆ-ն կնախագահեն միջազգային հանրության ԱԳ նախարարների հանդիպմանը՝ նվիրված Կորեական թերակղզու իրավիճակին, որը կանցկացվի 2018 թվականի հունվարի 16-ին Վանկուվերում: Այս մասին լրագրողներին հայտնել է Կանադայի ԱԳ նախարար Քրիստիա Ֆրիլանդը ԱՄՆ պետքարտուղար Ռեքս Թիլերսոնի հետ համատեղ մամուլի ասուլիսում, փոխանցում է ՏԱՍՍ-ը:
«Այսօր պետքարուղարն ու ես համաձայնվեցինք հանդիպումն անցկացնել հունվարի 16-ին Վանկուվերում, որին կհրավիրվեն աշխարհի տարբեր երկրների ԱԳ նախարարները, որպեսզի ցուցադրենք մեր միասնությունը Հյուսիսային Կորեայի վտանգավոր եւ անօրինական գործողությունների դեմ»,- ասել է նա՝ ընդգծելով, որ Կանադան հավատում է Հյուսիսային Կորեայի հարցի կարգավորման դիվանագիտական մոտեցմանը:
Թիլերսոնն իր հերթին հայտարարել է, որ առաջիկա հանդիպմանը մտադիր են քննարկել, թե ինչպես բարձրացնեն «Հյուսիսային Կորեայի վրա ճնշում գործադրելու ներկայիս արշավի արդյունավետությունը եւ հետագա դիվանագիտական ինչ ջանքեր պետք է ձեռնարկեն»: Դրանից զատ, նրա խոսքով, նախարարները կքննարկեն Փհենյանի հետ բանակցություններ սկսելու պատրաստակամության հարցը:
Հանդիպմանը կմասնակցեն 16 պետության ԱԳ նախարարներ, Վանկուվերում չեն լինի Հյուսիսային Կորեայի ներկայացուցիչները:
