Կորեական թերակղզում խաղաղություն և կայունություն ապահովելը բխում է բոլոր կողմերի շահերից, հայտարարել է Չինաստանի ԱԳՆ խոսնակ Մաո Նինգը այն բանից հետո, երբ Հյուսիսային Կորեան հայտարարել է, որ հաջողությամբ արձակել է իր առաջին լրտեսական արբանյակը ուղեծիր՝ զայրացնելով Սեուլին և Տոկիոյին:
«Չինաստանն ի գիտություն է ընդունել (Հյուսիսային Կորեա) արբանյակի արձակման մասին հայտարարությունը և համապատասխան կողմերի արձագանքները»,- ասել է Մաո Նինգը։ «Թերակղզում խաղաղության և կայունության պահպանումը և թերակղզու խնդրի քաղաքական կարգավորման գործընթացի խթանումը բխում է տարածաշրջանի բոլոր երկրների ընդհանուր շահերից»,- ասել է նա։
Հարավային Կորեան, Ճապոնիան և Միացյալ Նահանգները համակարգել են իրենց գործողություները Aegis կործանիչներ տեղակայելու հարցում՝ արձակմանը հետևելու համար և դրա հետ կապված տվյալներ են փոխանակել, հայտնել են հարավկորեական զինվորականները:
Բացի այդ, ամերիկյան «Կարլ Վինսոն» ավիակիրը ժամանել է հարավկորեական Բուսան քաղաքի նավահանգիստ՝ Հյուսիսային Կորեայի միջուկային և հրթիռային ծրագրերի ընդլայնված զսպման առաքելության շրջանակներում։
Մաոն հույս է հայտնել, որ բոլոր շահագրգիռ կողմերը «կպահպանեն հանգստություն և զսպվածություն կցուցաբերեն», կներգրավվեն կառուցողական երկխոսության մեջ և հավասարակշռված կերպով կարձագանքեն միմյանց օրինական մտահոգություններին: «Չինաստանը կշարունակի կառուցողական դեր խաղալ թերակղզու հիմնախնդրի քաղաքական լուծման խթանման գործում»,- ասել է նա։
