ԱՄՆ-ի, Ճապոնիայի և Հարավային Կորեայի առճակատման գործողությունները ապակայունացնում են Կորեական թերակղզու շրջակայքը և մեծացնում միջուկային պատերազմի վտանգը, այդ թվում՝ ծովում։ Այս մասին հայտարարել է ԿԺԴՀ ղեկավար Կիմ Չեն Ընը՝ Կորեայի ժողովրդական բանակի ռազմածովային ուժերի հրամանատարություն կատարած այցի ժամանակ։
«Որոշ ժամանակ առաջ ԱՄՆ-ի, Ճապոնիայի և Հարավային Կորեայի խմբավորման ղեկավարները հավաքվեցին և հայտարարեցին, որ տարբեր համատեղ զորավարժություններ են անցկացնելու և սկսեցին դրանք իրականացնել։ Թշնամական ուժերի, այդ թվում՝ ԱՄՆ-ի, անխոհեմ առճակատման զորավարժությունների պատճառով Կորեական թերակղզու շրջակայքի ջրերն այժմ դարձել են աշխարհում ռազմական տեխնիկայի ամենամեծ համակենտրոնացումը և ամենաանկայուն ջրային տարածքը՝ միջուկային պատերազմի վտանգով»,- նրա խոսքերը մեջբերում է Կորեայի կենտրոնական լրատվական գործակալությունը։
«Ներկայիս իրավիճակը պահանջում է, որ մեր նավատորմը գործադրի բոլոր ջանքերը՝ մշտական մարտունակությունը պահպանելու համար, պատրաստակամություն՝ կոտրել թշնամու պատերազմի կամքը՝ անկանխատեսելի հանգամանքների դեպքում»,- հավելել է ԿԺԴՀ ղեկավարը։
