ԱՄՆ նախագահ Ջո Բայդենը եւս մեկ տարով երկարացրել է ԿԺԴՀ-ի դեմ ԱՄՆ-ի միակողմանի պատժամիջոցների ռեժիմը։ Այս մասին են վկայում երկուշաբթի Սպիտակ տան մամուլի ծառայության հրապարակած փաստաթղթերը։
Խոսքը Փհենյանի դեմ այսպես կոչված արտակարգ դրության երկարաձգման մասին է, որը 2008, 2010, 2011, 2015, 2016 եւ 2017 թթ. ստորագրված նախագահական մի շարք հրամանագրերի հիման վրա սահմանված սահմանափակումների պահպանում է նախատեսում: Այն ժամանակ Վաշինգտոնի ձեռնարկած միջոցները, մասնավորապես, ուղղված էին Փհենյանի կողմից զանգվածային ոչնչացման զենքերի եւ դրանց առաքման եւ տարածման կանխմանը:
Հայտարարության մեջ ընդգծվում է, որ «Կորեական թերակղզում միջուկային զենքի տարածման վտանգը պահպանվում է», իսկ «Հյուսիսային Կորեայի կառավարության գործողություններն ու քաղաքականությունը շարունակում են վտանգ ներկայացնել Միացյալ Նահանգների ազգային անվտանգության, արտաքին քաղաքականության եւ տնտեսության համար»: «Այս կապակցությամբ ես մեկ տարով երկարացնում եմ Հյուսիսային Կորեայի հետ կապված ազգային արտակարգ դրությունը»,- ասված է Բայդենի կողմից հունիսի 13-ին ստորագրված ծանուցման տեքստում։ Սպիտակ տան մամուլի ծառայությունը նաեւ տարածել է պատժամիջոցների ռեժիմի երկարաձգման հետ կապված ԱՄՆ վարչակազմի ղեկավարի՝ Կոնգրեսի ղեկավարությանն ուղարկած նամակի պատճենը։ Մինչ այս Բայդենը նշված ռեժիմը երկարաձգել էր մինչեւ 2021 թ. հունիսի 21-ը:
Երկուշաբթի ԱՄՆ պետքարտուղար Էնթոնի Բլինքենը հայտարարել էր, որ ԱՄՆ իշխանությունները բաց են ԿԺԴՀ-ի հետ առանց նախապայմանների երկխոսությանը՝ Կորեական թերակղզու ապամիջուկայնացման նպատակով։ Միաժամանակ, ամերիկյան արտաքին քաղաքականության դեպարտամենտի ղեկավարն ընդգծել է, որ Վաշինգտոնը պատրաստ է շարունակել ճնշումը Փհենյանի վրա։
