Հյուսիսային Կորեան նախապատրաստվում է «Կվանմյոնսոն-5» («Շողացող աստղ-5») հետախուզական արբանյակի արձակմանը եւ հնարավոր է՝ այն իրականացնի առաջիկայում: Այս մասին հայտնել է Joonang Ilbo պարբերականը:
«Հյուսիսային Կորեան վերջերս ավարտեց արբանյակի մշակումը, որն անվանել է «Կվանմյոնսոն-5»: Սա հետախուզական սարք է, որը խցիկով եւ կոմունիկացիոն սարքավորմամբ է հագեցած»,- ասել է Հարավային Կորեայի կառավարությունում աղբյուրը:
Միաժամանակ Kyodo գործակալությունը հայտնել է, որ Հարավային Կորեայի շտաբների պետերի կոմիտեի նախագահը հայտարարել է, թե այս պահին Փհենյանի կողմից ուղեծրային արբանյակի արձակմանը պատրաստվելու ոչ մի նշան չի նկատվել:
Հյուսիսային Կորեան վերջին անգամ Երկրի արհեստական արբանյակով՝ «Կվանմյոնսոն-4», տանող հրթիռի արձակում է իրականացրել 2016 թվականի փետրվարին: Սակայն, ինչպես պնդում են մասնագետները, սարքը ոչ մի ազդանշան չի հաղորդել, ինչը կարող է վկայել դրա ոչ աշխատունակության մասին: Այս տարվա հունիսին Ժնեւում Զինաթափման համաժողովում ելույթ ունենալիս Հյուսիսային Կորեայի ներկայացուցիչը հայտարարել էր խաղաղ նպատակներով տիեզերական տարածքն ուսումնասիրելու Փհենյանի մտադրության մասին: Մինչդեռ մի շարք երկրներ՝ ներառյալ ԱՄՆ-ն, Հարավային Կորեան եւ Ճապոնիան նման արձակումները համարում են ՄԱԿ ԱԽ բանաձեւերի խախտում, քանի որ անմիջականորեն վերաբերում են հրթիռային ծրագրի զարգացմանը:
