Հայաստանում գների բարձրացման դեմ բողոքի ակցիան, որը կազմակերպել է «Ելք» ընդդիմադիր դաշինքը, տեղին ու ժամանակին է անցկացվել։ Լրագրողների հետ հանդիպման ժամանակ, հունվարի 22-ին, նման տեսակետ է հայտնել «Հայաստանի սպառողների ասոցիացիա» ՀԿ-ի նախագահ Արմեն Պողոսյանը։
Նրա խոսքով՝ նման ակցիաները արդյունք կտան, եթե դրանց ավելի շատ մարդ մասնակցի։ «Կարեւոր չէ, թե ով է այդ ակցիաների կազմակերպիչը, կարեւոր է, որ կազմակերպիչները բարի գործ են անում ու գործում են քաղաքացիների շահերից»,- նշել է Պողոսյանը։
Հիշեցնենք, որ բողոքի նոր ակցիան «Ելք» դաշինքը փետրվարի 5-ին է ծրագրել։
