Ֆրանկոֆոնիայի միջազգային համաժողովը մեզ համար շատ կարեւոր է, մենք այս թեմայի վրա երկար ենք աշխատել եւ վիթխարի միջոցառում ենք կազմակերպել, սա Հայաստանն ամբողջ աշխարհին ներկայացնելու լավ հնարավորություն է: Այս մասին Ֆրանսիա այցի ժամանակ L'Express պարբերականի հետ հարցազրույցում ասել է Հայաստանի նախագահ Սերժ Սարգսյանը:
Սարգսյանի խոսքով՝ Հայաստանն ամեն ինչ կանի, որ այս համաժողովը հաջող անցնի, հատկապես եթե հաշվի առնենք, որ մոլորակի պետությունների կեսը կմասնակցի Երեւանում անցկացող միջոցառմանը, մեծ մասը՝ պետությունների եւ կառավարությունների ղեկավարների մակարդակով:
«Մեզ համար Ֆրանկոֆոնիան ոչ միայն լեզվական միություն է, այլ ընդհանուր արժեքներ, որոնց շուրջ մարդկությունը զարգանում է, եւ որոնց նկատմամբ Հայաստանն ու Ֆրանսիան ընդհանուր մոտեցում ունեն: Համաժողովի կարգախոսն է Vivre ensemble («Միասին ապրել») արտահայտությունը: Սա նշանակում է հարգել հիմնարար իրավունքներն ու ազատությունները, սոցիալական համերաշխություն, խաղաղ գոյակցություն, տղամարդկանց եւ կանանց իրավահավասարություն, երիտասարդներին հնարավորությունների տրամադրում: Այս միջոցառման շրջանակում տեղի կունենա նաեւ մեծ տնտեսական համաժողով, որը կմիավորի ֆրանսախոս գործարարներին, եւ կդառնա մեծ միջազգային տնտեսական ցանցի հիմքը»,- ասել է Հայաստանի նախագահը: