Երեւանի Ավան եւ Նոր Նորք վարչական շրջանների ընդհանուր իրավասության դատարանում այսօր՝ հունվարի 24-ին, «Սասնա ծռեր-2»-ի գործով դատական նիստին հայտարարված ընդմիջման ժամանակ Շտապօգնություն է հրավիրվել «Սասնա ծռերի» անդամ Արմեն Բիլյանի համար։ Այսօր՝ հունվարի 24-ին, դատական նիստը վերսկսվելուն պես հայտարարեց գործը վարող դատավոր Մեսրոպ Մակյանը։
«Ընդմիջմանը Արմեն Բիլյանի խնդրանքով հրավիրվեց շտապօգնություն, Արմեն Բիլյանին բժիշկները զննեցին եւ նրա մոտ հայտնաբերեցին ընդհանուր թուլություն, զարկերակային ճնշումն է չափվել, էխոսրտագրություն, սուր խանգարում չի նկատվել, սնման խանգարում է հայտնաբերվել, ներարկում է կատարվել»,- հայտարարեց Մակյանը։
Հրավիրված շտապօգնությունը զննեց նաեւ Արայիկ Խանդոյանին, քանի որ վերջինս վիրահատությունից հետո դեռ իրեն լավ չի զգում։
Հիշեցնենք, որ «Սասնա ծռեր» խմբի գործով դատաքննությունը մի քանի ամիս շարունակ չէր սկսվում, նիստերն անընդհատ տապալվում էին, որից հետո որոշում կայացվեց գործը բաժանել 3 մասի: «Սասնա ծռեր» խմբի 11 անդամի մասով գործը քննում է Արտուշ Գաբրիելյանը Ավան եւ Նոր Նորք վարչական շրջանների ընդհանուր իրավասության դատարանում, իսկ անջատված մասերով երկու գործերը քննում են Կենտրոն եւ Նորք-Մարաշ վարչական շրջանների ընդհանուր իրավասության դատարանից գործուղված Մեսրոպ Մակյանն ու Էրեբունի եւ Նուբարաշեն վարչական շրջանների ընդհանուր իրավասության դատարանի նախագահ Արթուր Օհանյանը: