Երեւանի Ավան եւ Նոր Նորք վարչական շրջանների ընդհանուր իրավասության դատարանում այսօր՝ հունվարի 24-ին, «Սասնա ծռեր-2»-ի գործով դատական նիստին պաշտպան Դավիթ Գյուրջյանն ինքնաբացարկի միջնորդություն ներկայացրեց դատախազներ Արամ Արամյանին եւ Պետրոս Պետրոսյանին՝ իր պաշտպանյալին վիրավորելու համար։
«Դատախազներ Արամ Արամյանն ու Պետրոս Պետրոսյանը բազմիցս վիրավորել են Գագւիկ Եղիազարյանին, նրան անվանելով կենդանի, վիժվածք եւ դրա համար որեւէ պատասխանատվության չեն ենթարկվել։ Կարծում եմ, որ այս դատախազները իրավունք չունեն մասնակցել նիստերին եւ պետք է հեռացվեն գործի քննությունից»,- իր միջնորդությունը հիմնավորեց պաշտպանը։
Դատավոր Մեսրոպ Մակյանը միջնորդությունը խորհրդակցական սենյակում քննելուց հետո հայտարարեց, որ միջնորդությունը մերժվում է, դատարանը այդ միջադեպից հետո սանկցիա է կիրառել դատախազաների նկատմամբ եւ ինքնաբացարկ չի կարող կիրառել։
Նշենք, որ այսօր դատական նիստին գործում առկա գրավոր նյութերի քննություն է իրականացվում։
Հիշեցնենք, որ «Սասնա ծռեր» խմբի գործով դատաքննությունը մի քանի ամիս շարունակ չէր սկսվում, նիստերն անընդհատ տապալվում էին, որից հետո որոշում կայացվեց գործը բաժանել 3 մասի: «Սասնա ծռեր» խմբի 11 անդամի մասով գործը քննում է Արտուշ Գաբրիելյանը Ավան եւ Նոր Նորք վարչական շրջանների ընդհանուր իրավասության դատարանում, իսկ անջատված մասերով երկու գործերը քննում են Կենտրոն եւ Նորք-Մարաշ վարչական շրջանների ընդհանուր իրավասության դատարանից գործուղված Մեսրոպ Մակյանն ու Էրեբունի եւ Նուբարաշեն վարչական շրջանների ընդհանուր իրավասության դատարանի նախագահ Արթուր Օհանյանը: