Կատալոնիայի՝ Բելգիա փախած նախկին առաջնորդ Կարլես Պուչդեմոնը չի բացառել, որ կարող է անձամբ ներկայանալ ինքնավար շրջանի ապագա ղեկավարի թեկնածուի վերաբերյալ Կատալոնիայի խորհրդարանում կայանալիք բանավեճերին: Այս մասին Բրյուսելում Պուչդեմոնի հետ հանդիպումից հետո հայտնել է կատալոնյան պալատի խոսնակ Ռոջեր Թորենը, փոխանցում է «ՏԱՍՍ»-ը:
Խորհրդարանի նախագահը հանդես է եկել Կատալոնիայի նոր կառավարության շուտափույթ ձեւավորման օգտին, որը «կարող է աշխատել առաջին րոպեից»:
Ինքը՝ Պուչդեմոնը, հանդիպումից հետո ընդգծել է, որ մասնակցությունը խորհրդարանի նիստին իդեալական կլիներ: «Սակայն կան նաեւ այլ ուղիներ, եւ մենք որեւէ բան չենք բացառում», - ասաց նա:
Հիշեցնենք, որ Իսպանիայի տարածքում շարունակում է գործել Կատալոնիայի նախկին առաջնորդի կալանավորման օրդերը: Եթե նա Բելգիայից վերադառնա պիրենեյան թագավորություն, նրան անմիջապես կկալանավորեն: Պուչդեմոնի կողմնակիցներն առաջարկում են, որ նա կրկին զբաղեցնի Կատալոնիայի ղեկավարի պաշտոնը՝ հեռահար կամ իր ներկայացուցչի միջոցով: Մադրիդը խոստացել է դատարանում բողոքարկել նոր ղեկավարի պաշտոնը ստանձնելիս հնարավոր ցանկացած խախտում: