Հայաստանը մտահոգված է լարվածության նոր օջախով Սիրիայում: Այս մասին հունվարի 29-ին կայացած մամուլի ասուլիսի ժամանակ հայտարարեց Հայաստանի Հանրապետության արտաքին գործերի նախարար Էդվարդ Նալբանդյանը՝ պատասխանելով Սիրայում Թուրքիայի կողմից ծավալած ռազմական գործողությունների վերաբերյալ հարցին: «Տարածաշրջանում լարվածության նոր օջախի հայտնվելը մտահոգություն է առաջացնում: Այն մարդկային կորուստների է հանգեցնում, քաղաքացիական բնակչության շրջանում վիրավորներ կան, այդ թվում նաեւ՝ սիրիահայեր: Սա շատ լուրջ առիթ է մտահոգության համար»,- ասաց նախարարը:
Նրա խոսքով՝ «Իսլամական պետության» եւ այլ ահաբեկչական խմբավորումների դեմ պայքարում ձեռքբերված հաջողությունները հույս էին ներշնչում, որ Սիրիայում խաղաղություն եւ կայունություն կհաստատվի: Մնչդեռ լարվածության նոր օջախի հայտնվելը կարող է խոչընդոտ հանդիսանալ կայունացման համար: Մենք կողմ ենք, որպեսզի վիճահարույց հարցերը լուծվեն բանակցությունների միջոցով՝ այս թեմայով գործարկված միջազգային հարթակների կիրառմամբ», - ընդգծել է նախարարը:
