«Սասնա ծռերի» գործով մեղադրական կողմը դեռեւս չի ներկայացրել մի ապացույց, որը կազմվել է օրենքին համապատասխան: Երեւան քաղաքի ընդհանուր իրավասության դատարանի Ավան եւ Նոր Նորքի նստավայրում այսօր՝ հունվարի 31-ին, «Սասնա ծռերի» գործով նիստին հայտարարեց պաշտպան Արայիկ Պապիկյանը:
«Դեպքի վայրի զննություններից մեկը 4 անգամ կատարվել է, 4 անգամ էլ օրենքի խախտումով:Մինչ օրս մենք օրենքից դուրս փաստաթղթեր ենք ուսումնասիրում եւ շարունակելու ենք, եւ սա այն գործն է, որտեղ ներգրավված է 59 քննիչ, որոնք մի հատ օրենքով սահմանված դեպքի վայրի զննություն չեն կարողացել անել: 3 օր մի մարդու տանը աշխատել են, չեն հայտնաբերել զենք, հետո մարդը տանը մաքրություն է արել ու հայտնաբերել: Ամենաարտառոց բանը այն է, որ արձանագրություն ներկայացնելու, վերցնելու մասին: Դուք հասկանում եք, ինչի մասին է խոսքը»,-ասաց Արայիկ Պապիկյանը:
Սասնա ծռերի անդամ Վարուժան Ավետիսյանն էլ ասաց, որ ՊՊԾ գնդում հայտնաբերված հայտնի «կամասուտրա» ժամացույցը հանված է իրեղեն ապացույցների ցուցակից, ինչը ցույց է տալիս, որ մեղադրող կողմը չի ցանկանում ցույց տալ ՊՊԾ գնդի իրական դեմքը:
Հիշեցնենք, որ «Սասնա ծռեր» խմբի գործով դատաքննությունը մի քանի ամիս շարունակ չէր սկսվում, նիստերն անընդհատ տապալվում էին, որից հետո որոշում կայացվեց գործը բաժանել 3 մասի:
«Սասնա ծռեր» խմբի 11 անդամի մասով գործը քննում է Արտուշ Գաբրիելյանը, իսկ անջատված մասերով երկու գործը քննում են Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մեսրոպ Մակյանն ու Էրեբունի եւ Նուբարաշեն վարչական շրջանների ընդհանուր իրավասության դատարանի նախագահ Արթուր Օհանյանը:
