«Հեռուստատեսության եւ ռադիոյի մասին» օրինագիծը խորհրդարանի քննարկմանը չի ներկայացվել: Սա հնաավորություն է տալիս այն լրացուցիչ քննարկումներով վերջնամշակել: Այս մասին փետրվարի 5-ին լրագրողների հետ հանդիպման ժամանակ ասաց Խոսքի ազատության կոմիտեի նախագահ Աշոտ Մելիքյանը:
Նրա խոսքով՝ սա կարող է հանգեցնել այդ օրինագծի բարելավմանը մինչեւ խորհրդարանի քննարկմանը ներկայացնելը: «Երկրորդ նորությունն այնքան էլ լավը չէ, դա այն է, որ այս օրինագիծը հավանություն է ստացել կառավարության նոյեմբերի 16-ի նիստում, եւ այս ամբողջ ընթացքում վերանայման իմաստով ոչ մի առաջընթաց չի նկատվել»,- նշեց Մելիքյանը:
Նա հավելեց, որ կառավարությունն, ըստ էության, այս օրինագիծը մշակելիս հաշվի չի առել այդ հարցում հանրության կարծիքն ու դիրքորոշումը: Մասնավորապես՝ հարցի քննարկումն ընթացել է փակ ռեժիմով, չեն իրազեկվել ՀԿ-ները եւ ընդհանրապես հանրությունը:
Փորձագետը կարծում է, որ «Հեռուստատեսության եւ ռադիոյի մասին» օրինագիծը չի համապատասխանում ժամանակակից պահանջներին, միջազգային փորձը հաշվի չի առնում: «Կան մասնագետների արտահայտած մեծ թվով առարկություններ»,- պարզաբանեց նա:
Ինչպես ընդգծեց ՀԿ ղեկավարը, Հայաստանում թվային հեռարձակման ամբողջական ներդրումից հետո արդեն բավականին ժամանակ է անցել, սակայն երկրում մինչ օրս չկա մասնավոր մուլտիպլեքս, այսինքն՝ թվային հեռարձակման ցանցեր, իսկ պետական մուլտիպլեքսը իրական մրցակցության բացակայության դեպքում կարող է շուկայում իր պայմանները թելադրել: Սա, իր հերթին, կարող է այս ոլորտում փոքր եւ միջին բիզնեսի համար որոշակի բարդություններ ստեղծել:
Դրանից բացի, մարզային ալիքների դեպքում, Մելիքյանի կարծիքով, սա կարող է հանգեցնել իշխանությունների կողմից տեղեկատվական տարածքի մենաշնորհմանը:
Փորձագետը միեւնուն ժամանակ նշեց, որ շրջանային 10 հեռուստաալիքները, ըստ էության, թվային մշակման գործընթացից դուրս են եւ շարունակում են աշխատել այլընտրանքային ռեժիմում: Եվ դրանք, փաստորեն, փակման եզրին են:
Հիշեցնենք, որ անցյալ տարի կառավարության նոյեմբերի 16-ի նիստում «Հեռուստատեսության եւ ռադիոյի մասին» օրինագիծը հավանություն է ստացել: Նոր օրինագծի մշակումը պայմանավորված էր Հայաստանի Սահմանադրության մեջ կատարված լրացումներով: Ի պատասխան մի շարք հասարակական կազմակերպությունների մեղադրանքներին՝ լայն քննարկում անցկացնելու իշխանությունների ցանկության բացակայության մասին, Արդարադատության նախարարությունը, որը մշակել է այս աղմկահարույց օրինագիծը, հայտարարել էր, որ այն հրապարակվել էր իրավական տեղեկատվության պորտալում, սակայն հատկացված ժամանակահատվածում առաջարկներ չեն ստացվել:
