Երեւանի ընդհանուր իրավասության դատարանի Շենգավիթի նստավայրում այսօր՝ փետրվարի 14-ին, «Սասնա ծռերի» գործով դատական նիստը կրկին հետաձգվեց փաստաբանների գործադուլի պատճառով:
Նախագահող դատավոր Մեսրոպ Մակյանը հայտարարեց, որ նման վիճակը այլեւս չի կարող շարունակվել եւ դատարանը միջոցներ կձեռնարկի դատաքննությունը նորմալ հունով անցկացնելու համար:
«Փաստաբանների գործողությունները չեն բխում արդարադատության շահերից եւ դրանից ելնելով դատարանը պետք է որոշակի գործողություններ ձեռնարկի, հետագայում նման դեպքերից խուսափելու համար: Մենք կդիմենք հանրային պաշտպանի գասենյակ, որպեսզի հանրային պաշտպաններ ներգրավենք դատական նիստերը նորմալ շարունակելու համար»,- հայտարարեց դատավոր Մակյանը:
Նշենք, որ մինչ այդ «Սասնա ծռերի» անդամները հրաժարվել էին դատական նիստ անցկացնել իրենց պաշտպանների բացակայության պայմաններում:
Պաշտպան Հարություն Բաղդասարյան ն էլ հայտարարեց, որ առանց պաշտպանների հնարավոր չէ դատական նիստը շարունակել, քանի որ փաստաբանները գործադուլի մեջ են:
«Փաստաբանները փաստացի տեռորի մեջ են եւ իրենց իրավունքներից օգտվելով գործադուլ են անում: Մենք որեւէ փաստարկ չունենք, որ հենց էս գործի առնչությամբ են տուգանքների դրույթը մտցրել, քանի որ հենց այս դատավարությամբ սկսվեցին ճնշումները փաստաբանների նկատմամբ , այլապես թող 1 տարի առաջ այդ օրենքը ընդունեին: Թող օրենսդիրները հանեն այդ դրույթը, մենք էլ կարողանանք նորմալ շարունակել մեր աշխատանքը: Ես նույնպես գտնվում եմ գործադուլի մեջ, եկել եմ այս հայտարարությունը անելու համար»,-ասաց Հարություն Բաղդասարյանը եւ լքեց դատական նիստերի դահլիճը:
Հաջորդ դատական նիստը նշանակվեց փետրվարի 21-ին:
Նշենք, որ այսօր դատական նիստին չէին ներկայացել Մուշեղ Շուշանյանը, Արայիկ Պապիկյան, Արա Ղարագյոզյանը , իսկ պաշտպաններ Լուսինե Սահակյանը եւ Երվանդ Վարոսյանը տեղեկացրել էին, որ քննչական գործողությունների մասնակցելու պատճառով չեն ներկայանալու դատական նիստին:
Հիշեցնենք, որ «Սասնա ծռեր» խմբի գործով դատաքննությունը մի քանի ամիս շարունակ չէր սկսվում, նիստերն անընդհատ տապալվում էին, որից հետո որոշում կայացվեց գործը բաժանել 3 մասի: «Սասնա ծռեր» խմբի 11 անդամի մասով գործը քննում է Արտուշ Գաբրիելյանը Ավան եւ Նոր Նորք վարչական շրջանների ընդհանուր իրավասության դատարանում, իսկ անջատված մասերով մյուս գործը Կենտրոն եւ Նորք-Մարաշ վարչական շրջանների ընդհանուր իրավասության դատարանի դատավոր Մեսրոպ Մակյանը: