14 տարի առաջ դաժան ծեծի եւ խոշտանգման ենթարկված նախկին ընդդիմադիր Գրիշա Վիրաբյանն փետրվարի 15-ին ի վերջո առերեսվել է Երեւանի նախկին ոստիկանապետ Աշոտ Կարապետյանի հետ: Այս մասին NEWS.am-ի հետ զրույցում ասաց Վիրաբյանի փաստաբան Արա Ղազարյանը:
Նշենք, որ Գրիշա Վիրաբյանը պնդում է, որ Աշոտ Կարապետյանը իրեն խոշտանգել է ընդդիմադիրների կազմակերպած ցույցերին մասնակցելու համար։
«Նախաքննությունից ելնելով չեմ կարող մանրամասնել, թե ինչ է եղել առերեսման ընթացքում, բայց կարող եմ ասել, որ հնարավոր է՝ գործը հասնի դատարան»,- նշեց փաստաբանը:
Փաստաբանը հավելեց, որ ՄԻԵԴ-ի որոշումից հետո գործը վերաբացվեց, բայց շատ երկար տեւեց նախաքննությունը, սակայն կարծես թե գործում առաջընթաց կա:
Նշենք, որ դեռ 2012 թվականին Եվրոպական դատարանի կայացրած նախադեպային վճռով հաստատվել է՝ Գրիշա Վիրաբյանը ենթարկվել է խոշտանգման։ ՄԻԵԴ-ը նաեւ պարտավորեցրել է Հայաստանի Հանրապետությանը՝ վերաբացել հայաստանյան դատարաններում այդպես էլ լիարժեք քննություն չանցած աղմկահարույց գործը եւ պատժել 2004-ին ընդդիմության հանրահավաքների մասնակից Գրիշա Վիրաբյանին դաժան ծեծի ենթարկած ու խոշտանգած ոստիկաններին։
Հիշեցնենք, որ Գրիշա Վիրաբյանը 2004-ի ապրիլին ոստիկանության Արտաշատի բաժանմունքում դաժան ծեծի էր ենթարկվել ոստիկանների կողմից, որի հետեւանքով կորցրել էր մեկ ամորձին: Նա պնդում է, որ Ոստիկանության գեներալ-մայոր Աշոտ Կարապետյանը կարգադրել է նրան ձեռնաշղթա հագցնել եւ կոշիկով հարվածներ է հասցրել գոտկատեղից ներքեւ, ինչից հետո ծանր վիճակում Վիրաբյանը տեղափոխվել է հիվանդանոց։