Հանրային պաշտպան նշանակելը ձեւական է քանի որ մեկ հանրային պաշտպանը չի կարող 10 հոգու շահերը պաշտպանել։ Այս մասին այսօր՝ փետրվարի 21-ին, Երեւանի ընդհանուր իրավասության դատարանի Շենգավիթի նստավայրում հայտարարեց պաշտպան Արայիկ Պապիկյանը։
«Ո՞վ է տեսել մեկ պաշտպան 10 անձի պաշտպանություն կրականացնի, այն էլ այս քրեական գործով։ Դե ձեզ ինչ կա, որ ընդհանուր մեղադրանք եք առաջադրել, ընդգհանուր էլ պաշտպան եք տրամադրում։ Դե մի 1000 տարի տվեք «Սասնա ծռերին», ասեք թող իրար մեջ բաժանեն, ով ինչքան կուզի, կնստի»,- հայտարարեց Արայիկ Պապիկյանը։
Պաշտպան Հարություն Բաղդասարյանն էլ հայտարարեց, որ դատարանը հանրային պաշտպաններ նշանակելով իրար դեմ է հանում պայմանագրային եւ հանրային պշտպաններին։
«Փաստաբանական համայնքը մի պառակտեք, առանց այդ էլ պառակտված է, ես հիմա իմ գործընկերոջ համար պետք է կարգապահական վարույթ խնդրեմ, որ հարուցեն»,- ասաց պաշտպանը։
Նշենք, որ այսօր մեղադրողն ընթերցում է գործով առկա գրավոր ապացույցները։
