Երեւանի ընդհանուր իրավասության դատարանի Ավան եւ Նոր Նորքի նստավայրում «Սասնա ծռերի» գործով նախագահող դատավոր Արտուշ Գաբրիելյանը դատական սանկցիա կիրառեց եւ 5 ժամով նիստերի դահլիճից հեռացրեց բոլոր ամբաստանյալներին։
«Սասնա ծռերի անդամ Աշոտ Պետրոսյանը մինչեւ նիստերի դահլիճը լքելը հայտարարեց, որ չի ցանկանում առանց իր պաշտպանի ներկայության շարունակել դատական նիստը։
«Դուք մեզ ստիպում եք, դրդում եք, որ մենք լքենք դատական նիստերի դահլիճը եւ մեր նկատմամբ սանկցիա։ Ճխտել եք հանրային պաշտպաններին ու մենք պարտադրված լքում ենք դահլիճը։ Պահանջում ենք հետաձգել դատական նիստը, պահանջում եմ իմ պաշտպանին, ի՞նչ եք արել Արայիկ Պապիկյանին։ Ձեր չար միտումների պատճառով իմ պաշտպանն այսօր ներկա չի»,- հայտարարեց Աշոտ Պետրոսյանը։
Դատավոր Արտուշ Գաբրիելյանն էլ ասաց, որ պահանջում է, որպեսզի Աշոտ Պետրոսյանը մնա դահլիճում, ինչին Պետրոսյանը հակադարձեց, որ եթե դատավորը խնդրեր, ինքը կմնար դահլիճում։
Աշոտ Պետրոսյանը հայտարարեց, որ իրենք ապստամբ են եւ նորից են ապստամբելու․ «50 հոգանոց քննչական խումբ է եկել ոչ մեկ տղա չի եղել, դուխ չի ունեցել, գա, հարցնի՝ մենք ինչ ենք արել։ Մենք մտել ենք ՊՊԾ գունդ, այո ապստամբ ենք։ Ապստամբել ենք ու էլի ենք պաստամբելու»։ Նշենք, որ սկզբում նիստերի դահլիճը լքեցին Աշոտ Պետրոսյանն ու Արմեն Լամբարյանը՝ իրենց պաշտպանի չներկայանալու պատճառով։ Նրանց հետեւեցին «Սասնա ծռերի» մյուս անդամները՝ ի աջակցություն իրենց ընկերների։
Սասնա ծռերի գործով դատաքննությունն այժմ շարունակվում է կիսդատարկ դահլիճում։ Մեղադրողն ընթերցում է գործում առկա գրավոր ապացույցները։
Նշենք, որ Արտուշ Գաբրիելյանը քննում է «Սասնա ծռեր» խմբի անդամներ Արմեն Լամբարյանի, Աշոտ Պետրոսյանի, Արթուր Մելքոնյանի, Տիգրան Սարգսյանի, Արթուր Սողոմոնյանի, Գառնիկ Հովակիմյանի, Հովհաննես Վարդանյանի, Մանվել Աթոյանի, Վարդգես Գեւորգյանի, Կարո Եղնուկյանի և Խաչատուր Գիչյանի առանձնացված մասով գործը: