Թերթը զրուցել է «Բարգավաճ Հայաստան» կուսակցության խմբակցության քարտուղար Արամ Սաֆարյանի հետ:
Ամբողջ տարվա համար մեր ծրագրած միջոցառումների մասին դեռ մանրամասներ չեմ հայտնի, սակայն առաջիկա ամիսներին հրավիրելու ենք մեր հերթական համագումարը: Համապատասխան օրենքով սահմանված կարգի համաձայն, համագումարը պետք է անցկացնենք մինչեւ փետրվարի ավարտը: Ավելի ստույգ ժամկետներ նշել դեռ դժվարանում եմ: Համագումարի օրակարգում ընդգրկված կլինեն բազմաբնույթ հարցեր, որոնցից մեկն էլ ԲՀԿ ծրագրի եւ կանոնադրության փոփոխությունները կլինեն:
Ինչո՞ւ է այդպիսի փոփոխությունների անհրաժեշտություն առաջացել:
Այս փոփոխությունների շնորհիվ «Բարգավաճ Հայաստան» կուսակցությունը ավելի կնմանվի եվրոպական տիպի կուսակցություններին: Բանն այն է, որ մենք սերտ հարաբերություններ ենք հաստատել եւ առաջիկայում առավել գործնականորեն ենք համագործակցելու Եվրոպայի ժողովրդական կուսակցության հետ: Սա թերեւս մեր առաջ կանգնած ամենագլխավոր խնդիրն է, որ անպայման պետք է իրականացնենք առաջիկա երկու ամիսների ընթացքում:
Պարոն Սաֆարյան, վերջին ամիսներին համառորեն լուրեր են շրջանառվում, թե ԲՀԿ-ն առաջիկայում դուրս է գալու կոալիցիայից: Կա՞ն նման մտադրություններ կամ պատճառներ:
Նման մտադրություններ ինձ հայտնի չեն: Կոալիցիայից դուրս գալու խնդիր երբեւիցե ոչ ԲՀԿ քաղաքական խորհրդում, ոչ էլ խորհրդարանական խմբակցությունում չի քննարկվել:
