Հայաստանի եւ Ռուսաստանի հարաբերությունները գլոբալ առումով երբեւիցե չպետք է պայմանավորվեն այս կամ այն քաղաքական ուժի իշխանության գալով: Այս մասին, այսօր՝ մարտի 19-ին, ԱԺ-ում լրագրողների հետ զրույցում նշել է Հայաստանի ԱԳ փոխնախարար Շավարշ Քոչարյանը՝ անդրադառնալով ՌԴ-ում անցկացված ընտրությունների արդյունքների վերաբերյալ Հայաստանի դիրքորոշմանը:
Նրա խոսքով, այդ հարաբերություններն ավելի հիմնարար, ավելի մնայուն բազա ունեն:
«Ինչ վերաբերում է Պուտինի ընտրությանը, ապա տարիների ընթացքում ինքն է ղեկավարել, եւ մենք իր հետ ունենք երկարատեւ համապատասխան ձեւավորված հարաբերություններ, եւ կարծում եմ, որ դրանք կշարունակվեն»,-ասաց Քոչարյանը:
Հարցին, թե դա լավագույն ե՞լքն էր Հայաստանի համար, ԱԳ փոխնախարարը պատասխանեց, որ Հայաստանն իրավունք չունի գնահատել լավն ու վատը, երբ որեւէ երկրում տեղի է ունենում ընտրություն, դա այդ երկրին է վերաբերվում. «Եթե նպատակ կա որեւէ երկրի հետ ունենալ բարիդրացիական, դաշնակցային կամ այլ հարաբերություններ, դա մենք չպետք է պայմանավորենք իրենց ներքին քաղաքական զարգացումներով»: