Առաջիկա 5 օրերին Հայաստանի հարթավայրային տարածքներում ջերմաստիճանի կտրուկ անկում չի սպասվում: Այս մասին մարտի 23-ին լրագրողների հետ հանդիպման ժամանակ ասաց ԱԻՆ «Հայպետհիդրոմետ» ծառայության Օդերեւութաբանական կանխատեսումների կենտրոնի ղեկավար Գագիկ Սուրենյանը:
Նրա խոսքով՝ արդեն այսօր հանրապետությունում ջերմաստիճանը նորմայից մի փոքր բարձր է, եւ առաջիկա օրերին եւս բարձրացում է սպասվում: «Վաղը մենք սպասում ենք Հայաստանի ուղղութամբ տաք ցիկլոնի մոտեցում, որը շարժվում է Իրաքի կողմից»,- հավելեց Սուրենյանը: Ըստ որում՝ ինչպես պարզաբանեց օդերեւութաբանը, վաղը ջերմաստիճանը այսօրվա համեմատությամբ կբարձրանա 5-6 աստիճանով: Արդյունքում՝ առաջիկա շաբաթ օրը Հայաստանի տարածքում կդիտվի այս ժամանակահատվածի համար չափազանց բարձր ջերմաստիճանային ֆոն: Առանձնապես շոգ կլինի Սյունիքի մարզի հարթավայրային տարածքներում, Մեղրիում, Ղափանում, Ագարակում եւ դրանց կից բնակավայրերում: Այնտեղ օդի ջերմաստիճանը կարող է հասնել +31+33 աստիճանի, ըստ որում՝ Արարատյան դաշտավայրում ցերեկը սպասվում է +26+28 աստիճան: