Ժողովրդական պատգամավոր Նադեժդա Սավչենկոն հավաստիացնում է, որ օկուպացված Դոնբասից երբեք զենք չի տեղափոխել Ուկրաինայի կառավարության կողմից վերահսկվող տարածք: Այս մասին նա հայտարարել է իր նկատմամբ խափանման միջոց ընտրելու վերաբերյալ դատական նիստի ժամանակ, փոխանցում է «112 Ուկրաինա» հեռուստաալիքը:
«Ես երբեք այդ զենքը չեմ տեղափոխել: Չնայած այն հանգամանքին, որ վերջում մեղադրանքը հենց այդպես էր հնչում: Ես նույնիսկ չգիտեի, թե ինչպիսի զենք է այնտեղ տեղափոխվելու, այդ ամբողջ զինանոցը, որ դուք նշեցիք: Ձեր կողմից նշված զինանոցով, ըստ էության, կարելի է հաղթել պատերազմը»,- ասաց նա:
Սավչենկոն նաեւ նշել է, որ զենքը տեղափոխվել է Դոնբասից՝ դրա ծագման տեղը պարզելու համար: «Բոլոր մեղադրանքներն առ այն, որ ես զենք եմ գնել, բացարձակապես սուտ են, այդպիսի զինանոց գնելու համար ես փող չունեմ»,- եզրափակել է Սավչենկոն:
