YouTube-ի գրասենյակում կրակորցներ արձակած կնոջ հայրը՝ Իսմաիլ Աղդամը, դեպքից մեկ օր առաջ ոստիկանությանը զգուշացրել էր, որ դուստրը ատում է ընկերությանը: Այս մասին տղամարդը պատմել է Mercury News թերթին, հաղորդում է «ՌԻԱ Նովոստին»:
Իսմաիլի խոսքով՝ հանցագործություն կատարելուց մի քանի շաբաթ առաջ Նասիմը բողոքել էր, որ YouTube-ը «ֆիլտրել» է իր տեսանյութերը եւ դադարել է գումարներ վճարել:
«Նա զայրացած էր», — բացատրել է հայրը:
Իսմաիլի նշել է, որ ընտանիքը Քալիֆորնիայի Մաունթին Վյու քաղաքի ոստիկանությանը հայտնել էր երեքշաբթի դստեր անհետացման մասին: Հայրը հայտնել էր, որ դուստրը կարող էր գնալ YouTube-ի գլխավոր գրասենյակ, քանի որ «ատում էր» նրանց:
Մի քանի ժամ անց՝ տեղական ժամանակով 02:00-ին, ոստիկանությունը հայտնել էր ընտանիքին, որ կնոջը գտել են եւ «ամեն ինչ վերահսկվում է»
Ոստիկանության ներակայցուցիչ Քեթի Նելսոնը հրատարակությանը հաստատել է, որ այդ անունով կինը հայտնաբերվել է կայանատեղիում գտնվող ավտոմեքենայում՝ քնած վիճակում, սակայն հայտնի չէ, թե արդյոք իրավապահներն իմացել են ընկերության հանդեպ Նասիմի վերաբերմունքի մասին:
Ավելի վաղ Los Angeles Times թերթը հաղորդել էր, որ ԱՄՆ ոստիկանությունը ուսումնասիրում է YouTube-ի հասցեին քննադատական տեսանյութը, որը ենթադրաբար տեսագրել է ընկերության գրասենյակում կրակ բացած կինը:
Ընդ որում հրատարակության համաձայն՝ կայքի հետ կապված Նասիմի բոլոր սոցցանցերը ապաակտիվացվել էին երեքշաբթի, իսկ YouTube-ի ալիքը արգելափակվել էր ծառայության քաղաքականության լուրջ եւ բազմակի խախտումների համար:
Քալիֆորնիայի նահանգի Սան Բրունո քաղաքում գտնվող YouTube-ի գլխավոր գրասենյակում հրաձգությունը տեղի էր ունեցել երեքշաբթի: ԶԼՄ-ները հաղորդել էին, որ ոստիկանությունը պարզել է կնոջ ինքնությունը. նա Քալիֆորնիայի բնակիչ Նասիմ Աղդամն էր: Կինը մահացել է: Սան Ֆրանցիսկոյի հիվանդանոցի ներկայացուցիչը հաղորդել է, որ միջադեպի արդյունքում երեք մարդ վիրավորվել է: Նրանցից մեկի վիճակը ծայրահեղ է:
