Վարչապետ, ՀՀԿ փոխնախագահ Կարեն Կարապետյանի նախօրեին արած հայտարարությունն այն մասին, որ Սերժ Սարգսյանի թեկնածությունն է առաջարկելու վարչապետի պաշտոնում, «Ծառուկյան» խմբակցությունում դեռ քննարկման առարկա չի դարձել։ Վստահ են, որ քվեարկությունը միաձայն է լինելու, բայց դեմ, թե կողմ, դեռ որոշում չունեն։ «Ծառուկյան» խմբակցության պատգամավոր Վարդեւան Գրիգորյանը NEWS.am–ի հետ զրույցում հայտարարեց, թե անձամբ ինքը կարծում է, որ տասը տարին ամբողջովին բավարար է երկրի ղեկավարի պաշտոնը ստանձնելու համար։

Հարցին՝ Սերժ Սարգսյանի առաջադրումը չի հաստատում նախկինում հնչեցրած այն մտահոգությունը, որ Սահմանադրությունը փոխվում էր միայն Սերժ Սարգսյանի իշխանությունը հավերժացնելու նպատակով, Վարդեւան Գրիգորյանը պատասխանեց. «Սահմանադրության փոփոխության արդյունքում փոխվեց կառավարման համակարգը, դարձավ խորհրդարանական, Սահմանադրության փոփոխության հնարավորություն տրվեց քաղաքական մեծամասնությանը առաջադրելու իր վարչապետը, դա իրենց խնդիրն է։ Ուրիշ խնդիր է, որ տվյալ անձը ինչքան ժամանակ է ղեկավարում ոլորտը։ Խոսքը եթե գնում է նախագահի՝ հետագայում վաչապետի պաշտոն զբաղեցնելու մասին, իհարկե, կարծում եմ՝ իմ սուբյեկտիվ մոտեցումն է, որ տասը տարին լրիվ բավարար է տվյալ ոլորտում ղեկավարելու համար։ Ընդհանրապես ինքնանպատակ չի եղել 2 հնգամյա ժամկետներ ղեկավարելու ժամկետը, բայց դա արդեն մեծամասնության խնդիրն է»։

Ինչ վերաբերում է Սահմանադրության փոփոխության հարցում ԲՀԿ–ի՝ իշխանությանն աջակցելուն, Վարդեւան Գրիգորյանը նշեց, թե որեւէ մեկը չէր կարծում, որ դա իշխանության վերարտադրության նպատակով է։ Հարցին՝ գո՞հ են, որ նաեւ իրենց աջակցության արդյունքում այսօր Սերժ Սարգսյանը հնարավորություն ունի երրորդ անգամ առաջադրվելու երկրի ղեկավարի պաշտոնում, պատասխանեց. ««Բարգավաճ Հայաստան» կուսակցությունն այն ժամանակ կողմ է եղել, քանի որ դա հնարավորություն էր նախագահականից անցնելու խորհրդարանական կառավարման համակարգին։ Չեմ կարծում, որ այդ ժամանակ որեւէ մեկը մտածում էր, որ սահմանադրական փոփոխությունը վերարտադրության համար է»։