Միացյալ Նահանգները, Ֆրանսիայի եւ Միացյալ Թագավորության հետ միասին, քննարկում են Սիրիայի կառավարության ուժերի դեմ ռազմական հարված հասցնելու հնարավորությունը՝ ի պատասխան Դումա քաղաքում հնարավոր քիմիական հարձակման: Այս մասին գրում է The National Interest խմբագիր Դեյվ Մաջումդարը:
Նրա խոսքով, պարզ էր, որ ՄԱԿ-ի Անվտանգության խորհուրդը չի ընդունի ռուսական բանաձեւը, եւ կարծես թե, Թրամփի վարչակազմը ամեն դեպքում հիմնվում է ռազմական սցենարի վրա, որը նա նախատեսում է անցկացնել Ֆրանսիայի եւ Մեծ Բրիտանիայի հետ: «Իսկապես, ՄԱԿ-ում ԱՄՆ դեսպան Նիկի Հեյլիի խոսքով, ԱՄՆ-ն կարձագանքի Սիրիայում քիմիական հարձակումներին, անկախ նրանից, թե ինչ է կատարվում Անվտանգության խորհրդում», - գրում է նա:
Հեղինակը նշում է, որ Հեյլին չի նշել, թե կոնկրետ ինչպես է ԱՄՆ-ն պատասխանելու, բայց Թրամփի հռետորաբանությունը խոսում է այն մասին, որ Վաշինգթոնը լրջորեն քննարկում է ռազմական լուծումը:
«Ռուսաստանը, որը պնդում է, որ ենթադրյալ քիմիական հարձակումը սուտ է, կրկնում է նախորդ նախազգուշացումներն այն մասին, որ նա մի կողմ չի քաշվի, եթե Սիրիայում նրա ուժերի վրա դիտավորությամբ կամ ոչ դիտավորությամբ հարձակվեն», - գրում է Մաջումդարը:
Փորձագետը նշում է, որ տարածաշրջանում լարվածությունը մեծանում է, իսկ ռուսական ռազմական ուժերը արդեն մի քանի շաբաթ է ամերիկյան անօդաչու ինքնաթիռների ազդանշանները խլացնում են:
Բացի այդ, չհաստատված լուրերի համաձայն, որոշ ռուսական զորքեր բարձր պատրաստվածության են բերվել ամերիկյան կողմի հնարավոր հարվածի ակնակալիքով: