ՀՀԿ-ն վերջապես սկսել է քննարկել վարչապետի թեկնածուի հարցը: Իշխող կուսակցությունն այսօր գործադիր մարմնի նիստ է գումարել, որից հետո ՀՀԿ խոսնակը լրագրողներին հայտարարել է. քննարկվում է միայն Սերժ Սարգսյանի թեկնածությունը: Սակայն Սերժ Սարգսյանի թեկնածությունն առաջադրելու մասին Հանրապետականը պաշտոնապես կհայտարարի շաբաթ, կուսակցության խորհրդի նիստից հետո, իսկ երկուշաբթի արդեն այն կներկայացնեն Ազգային ժողովին: Հիշեցնենք, որ վարչապետի ընտրությունը տեղի կունենա ապրիլի 17-ին, խորհրդարանի հատուկ նիստում:
Մինչ այդ «Հանուն Հայաստան պետության» ճակատը բողոքի ակցիա է անցկացնում ՀՀԿ գրասենյակի շենքի մոտ: Նրանք Գարեգին Նժդեհի հրապարակից մետրոյով հասել են Զորավար Անդրանիկ կայարան՝ ճանապարհին քաղաքացիներին տեղեկացնելով ապրիլի 13-ի հանրահավաքի մասին: Հետո ցուցարարները գնացել են Մելիք-Ադամյան փողոց եւ փորձել փակել ՀՀԿ-ի շենքը, որպեսզի հանրապետականները չկարողանան մասնակցել Գործադիր մարմնի նիստին: Սակայն ոստիկանները փակել են դեպի շենք տանող ճանապարհը: Արդյունքում ցուցարարները փակել են Տիգրան Մեծ պողոտան. նրանք նստել են փողոցի բանուկ հատվածում եւ վանկարկում են «Մերժիր Սերժին», «Ազատ անկախ Հայաստան»: Երթեւեկությունը քաղաքի այս հատվածում կաթվածահար է եղել:
Նիկոլ Փաշինյանի թիմակիցներն այսօր որոշել էին Ազգային ժողովի ամբիոնից եւս մեկ անգամ հիշեցնել ապրիլի 13-ին Ազատության հրապարակում կայանալիք հանրահավաքի մասին, բայց՝ խորհրդարանի համար արտասովոր ճանապարհով: «Քաղաքացիական պայմանագիր» կուսակցությունից Արարատ Միրզոյանն ու Լենա Նազարյանը նիստերի դահլիճում «ծխե հրավառություն» են կազմակերպել:
Դահլիճը ծխով է պատվել, բայց ընդմիջում հայտարարելու՝ Գեւորգ Գորգիսյանի առաջարկը նիստը վարող Էդուարդ Շարմազանովը մերժել է: Արարատ Միրզոյանն ու Լենա Նազարյանը, պարզվում է, անակնկալի են բերել նույնիսկ «Ելք»-ի իրենց գործընկերներին: Մանե Թանդիլյանը սրտնեղել է. կարող էին գոնե զգուշացնել:
Իսկ կառավարության անդամներն այսօր Ազգային ժողով հարցուպատասխանի էին եկել պաշտոնակատարի կարգավիճակով: «Ելք»-ից Էդմոն Մարուքյանը վարչապետի պաշտոնակատարին հարց ուղղելիս շտապել է արձանագրել. մարդիկ Կարեն Կարապետյանի հետ հույսեր էին կապում, բայց արդյունքում ՀՀԿ-ն ընդամենը օգտագործեց նրան: Նոր կառավարության ձեւավորումից հետո կպահպանե՞ն, արդյոք, նախկին նախարարներն իրենց պաշտոնները: Արծվիկ Մինասյանն անձամբ իր մասով ոչինչ չգիտի, իսկ ընդհանրապես ՀՅԴ-ի պորտֆելների հարցում փոփոխություն չի սպասում: Կառավարության կազմում աշխատանքը շարունակելու ցանկություն ունի Լեւոն Ալթունյանը, չնայած մամուլի հրապարակումներին, որ առողջապահության ոլորտում խնդիրները շատ են, նրա աշխատանքից էլ, ըստ լուրերի, գոհ չեն:
Ազգային ժողովն այսօր միաձայն՝ 95 կողմ ձայնով ընդունեց Հայաստան-Եվրամիություն համաձայնագրի վավերացման մասին օրինագիծը: Հիշեցնենք, որ այն ստորագրվել է 2017-ի նոյեմբերի 24-ին եւ փոխարինելու է 1999 թվականից գործող «Գործընկերության եւ համագործակցության մասին» համաձայնագրին: Համաձայնագրի՝ ուժի մեջ մտնելու համար այն պետք է վավերացնեն նաեւ Եվրախորհրդարանն ու Եվրամիության անդամ բոլոր պետությունները: Հայաստանում Եվրամիության պատվիրակությունն ակնկալում է, որ Եվրախորհրդարանը դա կանի մայիսի կեսերին: Իսկ եվրոպական երկրներից մինչեւ հիմա համաձայնագիրը վավերացրել են Էստոնիան, Լիտվան ու Լատվիան, մյուսներում այն ընթացքի մեջ է:
Այսօր հուղարկավորել են ապրիլի 9-ին զոհված 19-ամյա Նարեկ Հարությունյանին: Ժամկետային զինծառայողը Կոտայքի մարզի Զովունի գյուղից էր, 9 ամիս անց զորացրվելու էր: Զովունիի համայնքապետի խոսքով՝ զինվորը սոցիալապես անապահով ընտանիքից էր. դպրոցահասակ եղբայր ունի, հայրը շինարար է, մայրը՝ հացթուխ: Հիշեցնենք, որ Նարեկ Հարությունյանը զոհվել է հակառակորդի դիպուկահարի արձակած կրակոցից: Նա հետմահու պարգեւատրվել է «Մարտական ծառայություն» մեդալով։
Լիազորությունները ստանձնած նախագահ Արմեն Սարգսյանն առաջին նշանակումներն է արել. այսօր խորհրդականներ եւ օգնական է նշանակել: Նրա հրամանագրով՝ նախագահի խորհրդականներ են նշանակվել Համլետ Գասպարյանին եւ Արա Ալեքսանյանին: Վերջինը, ի դեպ, կաշխատի հասարակական հիմունքներով: Իսկ Համլետ Գասպարյանը մինչ այս եղել է արտաքին գործերի նախարարի խորհրդականն ու ԱԳՆ քաղաքական ծրագրավորման վարչության պետը: Իսկ Արմեն Սարգսյանի նորանշանակ օգնականը Հասմիկ Պետրոսյանն է:
Եվրասիայի երկրները կանգնած են դեպի ավտորիտարիզմ գլորվելու վտանգի առջեւ: Freedom House իրավապաշտպան կազմակերպության հերթական զեկույցի համաձայն՝ Ուկրաինան, Մոլդովան, Վրաստանը, Հայաստանը եւ Ղրղզստանը բացասական ուղղությամբ են շարժվում: Զեկույցում նշվում է, մասնավորապես, Հայաստանում ժողովրդավարության եւ կոռուպցիայի ցուցանիշի նվազման մասին: Պատճառը, ըստ կազմակերպության մասնագետների, «ՀՀԿ-ի կողմից գործադիր, օրենսդիր եւ դատական իշխանությունների կոնսոլիդացիայի արդյունքում համակարգային կոռուպցիայի խորացման եւ բարձր մակարդակով չարաշահումներն արմատախիլ անելու՝ կառավարության ցանկության բացակայությունն է»: Արդյունքում, Հայաստանը համարվել է կիսակոնսոլիդացված ավտորիտար ռեժիմով երկիր:
Խոսրովի անտառում, արգելոցի պատմության մեջ առաջին անգամ, կովկասյան ընձառյուծ են նկատել: Կենդանուն նկարահանել են Բնության համաշխարհային հիմնադրամի ֆոտոթակարդները: Արգելոցում տեղադրված ֆոտոթակարդների արձանագրած նյութերը, ըստ բնապահպանության նախարարության, ցույց են տալիս, որ անցյալ տարվա հրդեհից հետո բնությունը վերականգնվում է եւ, բարեբախտաբար, դրա հետեւանքները կործանարար չեն եղել կենդանական աշխարհի համար: Կովկասյան ընձառյուծը գրանցված է Հայաստանի Կարմիր գրքում եւ Բնության պահպանության միջազգային միության Կարմիր ցուցակում: Մեր երկրում այժմ 7-9 ընձառյուծ է հաշվառված, որոնց հիմնական բնակության վայրերն են Արարատի, Վայոց Ձորի եւ Սյունիքի մարզերը:
Ապրիլի 11-ին դոլարի ու եվրոյի արժեւորումը շարունակվել է, ռուբլին նորից էժանացել է: Դոլարի փոխարժեքն այսօր կազմել է 483 դրամ, եվրոյինը՝ 597, ռուբլունը՝ 7 դրամ 52 լումա, ֆունտինը՝ 685 դրամ:
Ապրիլի 12-ին երեկոյան ժամերին եւ 13-14-ին հանրապետությունում սպասվում է կարճատեւ անձրեւ եւ ամպրոպ: Օդի ջերմաստիճանը 14-15-ին 6-7 աստիճանով կնվազի: Երեւանում նույնպես վաղը երեկոյան հնարավոր են կարճատեւ տեղումներ: Մայրաքաղաքում գիշերը կդիտվի +10+12, ցերեկը՝ +23+25 աստիճան տաքություն:
