Մենք ամենայն ուշադրությամբ հետեւում ենք Ռուսաստանի հանդեպ կիրառվող պատժամիջոցներին, որովհետեւ Ռուսաստանը մեր խոշորագույն առեւտրային գործընկերն է: Այս մասին, այսօր՝ ապրիլի 12-ին, Կառավարության նիստից հետո տեղի ունեցած ճեպազրույցում նշել է Տնտեսական զարգացման և ներդրումների նախարարի պաշտոնակատար Սուրեն Կարայանը:
Նրա խոսքով, ամենաշատը, որ կարող է Հայաստանի վրա ազդեցություն ունենալ, ռուսական արժույթի տատանումներն են. «Դեռեւս կարճաժամկետ կտրվածքով որեւէ վտանգ դա չի ներկայացնում, բայց մենք հետեւում ենք, ինչպես նաեւ կոնսուլտացիաներ ենք անում մեր ռուս գործընկերների հետ: Մեր ուշադրության կենտրոնում ենք պահելու եւ քնարկումներ ենք ունենում մեր արտահանողների հետ, որոնք իրենց պայմանագրային հարաբերությունները կարգավորում են հենց ռուսական ռուբլով: Անհրաժեշտության դեպքում կառավարությունն օժանդակության իր գործիքակազմով հանդես կգա»,-ընդգծեց նախարարի պաշտոնակատարը:
Նշենք, որ վերջին օրերին ռուսական ռուբլին կտրուկ անկում է գրանցել: Եթե մի քանի օր առաջ ռուսական ռուբլին արժեր մոտ 8,3 դրամ, ապա այսօր այն հասել է շուրջ 7,6-7,7 դրամի: