Մենք եկել ենք Հայաստանն ազատելու Սերժ Սարգսյանի իշխանությունից եւ այսօր դրա համար մեզ միայն մի բան է պակասում՝ ՀՀ քաղաքացիների տված լիազորությունը: Այս մասին, այսօր՝ ապրիլի 14-ին, Ֆրանսիայի հրապարակում հանրահավաքի ժամանակ նշեց «Քաղաքացիական պայմանագիր» կուսակցության առաջնորդ Նիկոլ Փաշինյանը (ֆոտոռեպորտաժ):
Նրա խոսքով, իրենց խնդիրը պարզ է. «Ազգային ժողովը պիտի փորձի Սերժ Սարգսյանին ընտրել վարչապետ: Մեր խնդիրն է հավաքվել այստեղ տասնյակ հազարներով եւ շարժվել ԱԺ, շրջափակել ԱԺ-ն, որպեսզի որեւէ ՀՀԿ-ական պատգամավոր չկարողանա մուտք գործել այնտեղ, որպեսզի Սերժ Սարգսյանը չկարողանա մուտք գործել այնտեղ: Մենք դա անելու ենք նույնկերպ, ինչպես այսօր Հանրային ռադիոյի շենքում: Մենք կանգնելու ենք խորին հարգանքով նրանց զենքերի առջեւ եւ ասելու ենք՝ կրակում եք, կրակեք, բայց ես անցնելու եմ, ես չեմ կանգնի ձեր կամայականությունների, ձեր ապօրինությունների, ձեր լկտիության առաջ: Ես չեմկանգնի Սերժ Սարգսյանի առաջ»,-հայտարարեց Փաշինյանը:
«Ես գնալու եմ եւ եթե իմ հետեւից եկող ժողովուրդ կա, եկեք միասին գնալու»,-ընդգծեց նա:
Ավելի վաղ NEWS.am-ը հայտնել էր, որ «Քաղաքացիական պայմանագիր» կուսակցությունը՝ Նիկոլ Փաշինյանի գլխավորությամբ, մարտի 31-ից քայլարշավ է սկսել Հայաստանի քաղաքներով, որն ավարտվել է ապրիլի 13-ին, Ազատության հրապարակում շուրջօրյա հանրահավաքով, ապա նստացույցով Ֆրանսիայի հրապարակում: Նրանք հայտարարել են, որ մտադիր են ապրիլի 17-ին շրջափակել ԱԺ շենքը, նաեւ պատգամավորների տները եւ թույլ չտալ, որ նրանք մասնակցեն ԱԺ-ում վարչապետի ընտրությանը: «Ելք» դաշինքի մյուս երկու կուսակցությունները՝ «Լուսավոր Հայաստանը» եւ «Հանրապետությունը» չեն միացել այս պայքարին:
Հիշեցնենք, որ ապրիլի 17-ին ԱԺ հատուկ նիստում տեղի կունենա վարչապետի ընտրությունը: ՀՀԿ-ն վարչապետի թեկնածու կառաջադրի Սերժ Սարգսյանին: