Ազգային ժողովի հատուկ նիստում ՀՀԿ նախագահ Սերժ Սարգսյանը Հայաստանի վարչապետ ընտրվեց: ՀՀԿ-ի եւ ՀՅԴ-ի առաջադրած թեկնածուի օգտին քվեարկել է 77, դեմ՝ 18 պատգամավոր:
Ինչպես սպասվում էր՝ Սերժ Սարգսյանի թեկնածությանը դեմ են քվեարկել «Ելք» խմբակցությունից խորհրդարան եկած 4 պատգամավորները: «Ծառուկյան» խմբակցությունը դեռ երեկ հայտարարել էր, որ որոշել են պատգամավորներին ազատ քվեարկելու հնարավորություն տալ: Խմբակցության ղեկավար Գագիկ Ծառուկյանն Ազգային ժողով չէր եկել, երեք պատգամավորներ էլ՝ Տիգրան Ստեփանյանը, Վահան Կարապետյանն ու Սերգեյ Բագրատյանը չեն մասնակցել քվեարկությանը: Իսկ կողմ քվեարկածների թվում են, մասնավորապես, Արգամ Աբրահամյանը, Հրանտ Մադաթյանը, Վարդան Բոստանջյանը, Մելիք Մանուկյանը, Իշխան Զաքարյանը եւ այլք:
Իսկ մինչ քվեարկությունը պատգամավորները Սերժ Սարգսյանին հարցեր ուղղելու հնարավորություն ունեին: Հետաքրքիր է, որ ընդդիմությունից հերթագրվել էր միայն Արտակ Զեյնալյանը: Փոխարենը ընդդիմադիր պատգամավորներն ակտիվ էին ելույթ ունենալիս: Ելույթների ընթացքում Հանրապետականները գովեստի խոսքեր շռայլեցին վարչապետի թեկնածուի հասցեին՝ խոսելով հատկապես նրա փորձառության մասին: Փոխարենը սուր էին «Ելք»-ից Արամ Սարգսյանի եւ Էդմոն Մարուքյանի ելույթները: Ընտրվելուց հետո Սերժ Սարգսյանը շնորհակալություն հայտնեց խմբակցություններին: Իսկ «Ելք»-ին նորընտիր վարչապետը երեք խորհուրդ ուներ:
Հավելենք, որ նախագահ Արմեն Սարգսյանն արդեն ստորագրել է Սերժ Սարգսյանին վարչապետի պաշտոնում նշանակելու մասին հրամանագիրը: Կառավարության նոր ղեկավարը 5 օր ժամանակ ունի՝ հանրապետության նախագահին փոխվարչապետերի եւ նախարարների թեկնածուներին առաջարկելու համար: Իսկ նոր կառավարությունը պետք է կազմավորվի 15-օրյա ժամկետում:
Նիկոլ Փաշինյանը չկարողացավ խոչընդոտել պատգամավորների մուտքը Ազգային ժողով եւ խափանել վարչապետի ընտրությունը: Ի սկզբանե ծրագրած խորհրդարանի շենքի շրջափակումն այդպես էլ իրականություն չդարձավ: Երեկ նա հայտարարել էր, որ վաղ առավոտից տարբեր ուղղություններով փակելու են դեպի Ազգային ժողով տանող ճանապարհները, սակայն այսօր նույնիսկ նման փորձ չարվեց: Մինչ այդ, ոստիկաններն ուժեղացված հսկություն էին իրականացնում Բաղրամյան պողոտայի սկզբնամասում. այստեղ երկշարք փշալարեր են տեղադրված, նաեւ ջրցան մեքենա է բերվել:
Փոխարենը, երբ մեկնարկեց Ազգային ժողովի հատուկ նիստը, Ֆրանսիայի հրապարակում Նիկոլ Փաշինյանը հայտարարեց «թավշյա հեղափոխության» մասին: Ելույթից անմիջապես հետո ցուցարարները Փաշինյանի գլխավորությամբ ճամփա ընկան՝ Ազգային ժողովի փոխարեն պետական այլ կառույցների շենքերը շրջափակելու: Առաջինը գլխավոր դատախազության շենքն էր: Դրանից հետո ակտիվիստներն արգելափակեցին Վճռաբեկ դատարանի, մի քանի նախարարությունների, ՊԵԿ-ի շենքերի մուտքերը: Յուրաքանչյուր շենքի դիմաց, Փաշինյանի հորդորով, 10-15 կամավոր էր հերթապահում:
Ավելի ուշ մեկնարկեց հերթական հանրահավաքը, բայց այս անգամ՝ Հանրապետության հրապարակում: Նշենք, որ այս օրերին ոստիկանությունը պարբերաբար հայտարարություն էր տարածում՝ կոչ անելով դադարեցնել հավաքներն ու երթերը, փողոցներ չփակել եւ չխոչընդոտել քաղաքացիների անցուդարձը: Այսօր առավոտյան էլ Երեւանի փոխոստիկանապետը հավաքը դադարեցնելու մասին ծանուցում փոխանցեց Նիկոլ Փաշինյանին: Վերջինը, սակայն, պատռեց այն:
Այս օրերի հանրահավաքներին ու երթերին, ոստիկանության հայտարարության համաձայն՝ նաեւ անկարգությունների մասնակցելու կասկածանքով 82 անձ բերման է ենթարկվել, այդ թվում՝ դասադուլ հայտարարած եւ Փաշինյանին միացած բազմաթիվ ուսանողներ: Ավելի ուշ նրանցից 76-ն ազատ է արձակվել: Քննչական ծառայությունն էլ հայտնեց 3 անձի ձերբակալության մասին:
Այսօր Ազգային ժողովում եւ Երեւանի քաղաքապետարանում պայթուցիկ նյութի ու սարքի առկայության մասին ահազանգեր են ստացվել: Խորհրդարանում պայթուցիկ նյութի մասին ահազանգը ստացել է ոստիկանությունը: Պարզվել է, որ ահաբեկչության մասին ահազանգը կեղծ է: Ընդ որում, հեռախոսային ահաբեկիչն արտերկրից է. ԱԱԾ-ի տվյալներով՝ Բաքվում ծնված, վերջին տարիներին Գերմանիայում բնակվող ազգությամբ հայ: Երեւանի քաղաքապետարանում պայթուցիկ սարքի մասին ահազանգ էլ ստացել է ԱԻՆ-ը: Տեղազննման արդյունքում, սակայն, ոչինչ չի հայտնաբերվել:
Ապրիլի 17-ին դոլարի արժեզրկմանը միացել է նաեւ եվրոն, ռուբլին աննշան աճել է: Դոլարի փոխարժեքը կազմել է 481 դրամ, եվրոյինը՝ 596, ռուբլունը՝ 7 դրամ 83 լումա, ֆունտինը՝ 689 դրամ:
Ապրիլի 18-19-ին հանրապետությունում սպասվում է առանց տեղումների եղանակ: Օդի ջերմաստիճանը 5-6 աստիճանով կբարձրանա: Երեւանում նույնպես վաղը տեղումներ չեն սպասվում: Մայրաքաղաքում գիշերը կդիտվի +5+7, ցերեկը՝ +19+21 աստիճան տաքություն: