Ավելի լավ է Սերժ Սարգսյանը առանց ավելորդությունների հենց այսօր, այս երեկոյան հրաժարական տա, որովհետեւ ինքը չի կարող լինել Հայաստանի վարչապետ։ Այդ մասին Հանրապետության հրապարակում ընթացող հանրահավաքում հայտարարել է ԱԺ պատգամավոր Նիկոլ Փաշինյանը։
Նրա խոսքով, Սերժ Սարգսյանի հետագա պաշտոնավարումը պրոբլեմներ է ստեղծում Հայաստանի անվտանգության համար։ «ՀՀ ԱԱԾ տնօրենի ուղիղ պարտականությունն է դա բացատրել Սերժ Սարգսյանին։ Նա պետք է հեռանա, ուրիշ տարբերակ ուղղակի չկա»,- նշել է Փաշինյանը։
Պատգամավորի խոսքով, իշխանությունը մտածում է, թե իրեն ձերբակալելու դեպքում շարժումը կմարի։ «Եթե նույնիսկ ինձ այսօր ձերբակալեք, պետք է ԱԺ բերեք ինձ, հատուկ նիստ անեք։ Եւ ես լինելու եմ Ազգային ժողովում, եւ հենց այդ օրն է դառնալու ձեր վերջին օրը»,- ասել է Փաշինյանը՝ նշելով, որ այսօր փորձել են իրեն բերման ենթարկել, փոխարենը տասնայկ կարեւոր ճանապարհներ են փակվել։
Ըստ Փաշինյանի, երեկվանից դաժան կերպով բերման են ենթարկվում շարժման կողմնակիցները, իսկ բանդաները սկսել են կոտրել որոշ մեքենաներ, որոնց տերերը միացել են հավաքներին։ «Ինչ լինում ա, ժեշտին լինի»,- ասել է Փաշինյանը՝ հավելելով, թե քաղաքի դզող-փչողներից եկել էին, ասում, որ մեքենաները կսարքեն։ Նա խոստացել է, որ վնասված բոլոր մեքենաների սեփականատերերի ծախսերը հոգալու են, իսկ վարչական վարույթները չեղարկվելու են։
- Սամվել Ալեքսանյանը երկխոսության կոչ է անում եւ ոտքով հարվածում վարորդին
- Թեժ իրավիճակ Էջմիածին-Երեւան ճանապարհին. այստեղ է նաեւ Առաքել Մովսիսյանը
- Քննարկման թեման կարող է լինել միայն Սերժ Սարգսյանի հրաժարականը. Փաշինյան (վիդեո)
- Սերժ Սարգսյանը Փաշինյանին կոչ է անում անհապաղ նստել բանակցությունների սեղանի շուրջ
- Փաշինյանը կոչ է անում հավաքվել Նոր Նորքի 6-րդ զանգվածում
- Նիկոլ Փաշինյանը ներկայացրեց իր պայմանները իշխանությանը