ԱՄՆ-ն ակնկալում է Հյուսիսային Կորեայի միջուկային ծրագրերի էական կրճատում, եւ մինչեւ ապամիջուկայնացման չհասնենք, առավելագույն ճնշում գործադրելու գլոբալ արշավը կշարունակվի: Այս մասին ճեպազրույցում Տորոնտոյում ընթացող «Մեծ յոթնյակի» երկրների (Մեծ Բրիտանիա, Գերմանիա, Իտալիա, Կանադա, ԱՄՆ, Ֆրանսիա եւ Ճապոնիա) ԱԳ նախարարների հանդիպման արդյունքներով լրագրողներին ասել է ԱՄՆ վարչակազմի ներկայացուցիչը: Սղագրությունը տարածել է ԱՄՆ Պետքարտուղարության մամուլի ծառայությունը, փոխանցում է ՏԱՍՍ-ը:
Նրա խոսքով՝ «Յոթնյակի» երկրների ԱԳ նախարարները «Հյուսիսային Կորեայի հարցով լավ քննարկում են անցկացրել»: «Մենք ասացինք, որ Հյուսիսային Կորեայի կողմից միջուկային փորձարկումների դադարեցումը երկար սպասված նորություն էր, եւ սա նաեւ համապատասխանում է Հյուսիսային Կորեայի խոստումներին, որը մարտին տրվել էր ԱՄՆ-ին»,- ասել է պաշտոնյան՝ շարունակելով, որ Վաշինգթոնը «չի պատրաստվում կրկնել անցյալի սխալները, երբ փուլային մոտեցումները ձախողվել են»: Մենք սկզբում ակնկալում ենք Հյուսիսային Կորեայի միջուկային ծրագրերի էական կրճատում, եւ մինչեւ ապամիջուկայնացման չհասնենք, առավելագույն ճնշում գործադրելու գլոբալ արշավը կշարունակվի»,- հավաստիացրել է նա:
Նա չի պատասխանել հարցին՝ ԱՄՆ-ն Հյուսիսային Կորեայի առաջնորդ Կիմ Չեն Ընի հետ երկրի նախագահ Դոնալդ Թրամփի առաջիկա հանդիպումից առաջ դնո՞ւմ է արդյոք որեւէ նախապայման: Միայն կրկին հավաստիացրել է, որ Փհենյանի վրա ճնշումը չի թուլացվի:
Անցյալ շաբաթավերջին Կիմ Չեն Ընը Կորեայի Աշխատանքային կուսակցության լիագումար նստաշրջանի արդյունքներով հայտարարել էր, որ Հյուսիսային Կորեան դադարեցնում է միջուկային եւ հրթիռային փորձարկումները, ավարտում է իր միջուկային զորավարժարան Փունգերիի աշխատանքը եւ միանում միջուկային զինաթափման գլոբալ գործընթացին՝ սոցիալիստական տնտեսության կառուցման իր նոր ռազմավարության համաձայն: