Ամերիկյան Facebook ընկերությունը տվյալների արտահոսքի սկանդալի ֆոնին ընթացիկ տարվա 1-ին եռամսյակում, որն ավարտվել է մարտի 31-ին, հասել է եկամտի եւ շահույթի էական աճի: Այս մասին նշված է ընկերության հաշվետվության մեջ, փոխանցում է ՏԱՍՍ-ը:
Մեկ եռամսյակում Facebook-ի եկամուտն աճել է գրեթե 50 տոկոսով՝ հասնելով մինչեւ 11,97 մլրդ դոլար նիշին: Ըստ որում՝ զուտ եկամուտը 2017 թվականի 1-ին եռամսյակի 3,06 մլրդ դոլարից այս տարվա 1-ին եռամսյակում աճել է գրեթե մինչեւ 5 մլրդ դոլար: Համապատասխանաբար աճը կազմել է 63 տոկոս:
«Չնայած լուրջ մարտահրավերներին, մեր հանրույթը շարունակում է աճել: Ամեն ամիս Facebook-ից օգտվում է 2,2 մլրդ մարդ, իսկ ամեն օր՝ 1,4 մլրդ-ից ավելի»,- նշել է ընկերության ղեկավար Մարկ Ցուկերբերգը: 2017-ի 1-ին եռամսյակի համեմատությամբ օգտատերերի թիվը ամսական աճել է մոտ 70 մլն-ով:
Facebook-ը սկանդալի կենտրոնում էր հայտնվել, երբ The New York Times պարբերականը հայտնել էր, որ բրիտանական Cambridge Analytica ընկերությանը հաջողվել էր ստանալ Facebook-ի ավելի քան 50 մլն օգտատերերի անձնական տվյալները, որպեսզի մշակեր ընտրողների քաղաքական նախապատվությունների վերլուծության ալգորիթմը:
Մարտի 21-ին Մարկ Ցուկերբերգը CNN-ի եթերում ներողություն էր խնդրել տեղի ունեցածի համար: Նա խոստացել էր հնարավոր ամեն ինչ անել օգտատերերի անձնական տվյալների նոր արտահոսք թույլ չտալու համար: