Սփյուռքում բոլորը միասնական են հաղթանակի համար։ Այդ մասին Գյումրիում ընթացող հանրահավաքում ասել է կանադահայ դերասանուհի Արսինե Խանջյանը։
«Մեզ երկար փորձել եք ապացուցել, որ սփյուռքը պետք է մասնակցի Հայաստանի կյանքի ներքին ընթացքին։ Մեկ ճանապարհը, որ ճիշտն էր, որ ձեզ թիկունք լինել, այլ ոչ մենք փոփոխությունը բերել։ Դուք եք, որ կարողացաք հաղթել եւ հաղթանակի դրոշմը բերել մեր հայրենիքին։
Շնորհակալություն եմ հայտնում ոչ միայն իմ անունից, այլ շատ քաղաքացիների կողմից, որ ապրում են արտերկրում։ Շատերը կան, որ այսօր ձեզ հետ են։ Բոլորը միասնական են, հաղթանակի համար»,- ասել է նա։
Արսինե Խանջյանի խոսքով, մարդիկ հաղթահարեցին վախը, Նիկոլ Փաշինյանը միայն ուղղություն տվեց ժողովրդին։ «Առանց վայրագ գործողությունների, խաղաղ կարողացավ միացնել հայությանը»,- ասել է Արսինե Խանջյանը։
Նշենք, որ նախօրեին Փաշինյանը հանրահավաքում հայտարարեց, որ ապրիլի 27-ին, ժամը 18.00-ին հանրահավաք են անելու Գյումրիի Վարդանանց հրապարակում. դեպի Գյումրի ավտոերթը կշարժվի ուղիղ ժամը 15.00-ին՝ Աշտարակի խճուղու սկզբնամասից՝ 15-րդ թաղամասի եւ ՊՆ նախկին շենքի միջեւ ընկած հատվածից:
Բացի այդ, ապրիլի 28-ին, ժամը 15.00-ին հանրահավաք է տեղի ունենալու Վանաձորի Արցախ պուրակում. դեպի Վանաձոր ավտոերթը կշարժվի ապրիլի 28-ին, ժամը 12.00-ին Ավանի Հարսնաքարի դիմացի հատվածից: