Իրանը եւ Սիրիան Ռուսաստանի փաստացի դաշնակիցներն են, սակայն այս կարգավիճակը իրավաբանորեն ոչ մի կերպ ձեւակերպված չէ: Այս մասին NEWS.am-ի հետ զրույցում ասաց ռուսական Քաղաքական եւ ռազմական վերլուծության ինստիտուտի փոխտնօրեն Ալեքսանդր Խրամչիխինը:
Նրա խոսքով՝ Մոսկվան հայտարարում է ահաբեկչության դեմ պայքարի մասին, այսինքն՝ իսլամական արմատական խմբավորումների դեմ, եւ եթե իսրայելական ավիացիան Սիրիայում ռուսական ռազմական օբյեկտներին չի հարվածում, ապա Կրեմլը կարող է աչքերը փակել հրեական պետության կողմից որոշ գրոհների հանդեպ՝ սոսկ իր դժգոհությունը հայտնելով: «Մայիսի 9-ին Մոսկվա Բենիամին Նեթանյահուի այցը կապված էր մի քանի հարցերի հետ, որոնք շտապ քննարկման կարիք ունեին: Ես, իհարկե, ոչ մի բանակցության չեմ մասնակցել, սակայն նրանք, բնականաբար, քննարկել են Սիրիայի շուրջ ստեղծված իրավիճակը, այն կարմիր գծերը, որոնք չպետք է հատեն ո՛չ Ռուսաստանը, ո՛չ Իսրայելը»,- հավելեց Խրամչիխինը: Միաժամանակ, փորձագետի կարծիքով՝ տարածաշրջանում եւ մասնավորապես Սիրիայում իրավիճակը կսրվի, ըստ որում՝ շատ կտրուկ:
Նշենք, որ Իսրայելի վարչապետ Բենիամին Նեթանյահուն ավելի վաղ մասնակցել է Հայրենական մեծ պատերզմում Հաղթանակի 73-րդ տարեդարձին նվիրված շքերթին, որն անցկացվել է Մոսկվայի Կարմիր հրապարակում: Ռուսաստանի մայրաքաղաք իր այցից առաջ եւ հետո նա հրամայել էր ավիահարվածներ հասցնել Սիրիայի տարածքում «իրանական օբյեկտներին»՝ սադրելով տարածաշրջանում իրավիճակի կտրուկ լարում:
