Եմենի նոր արտգործնախարարը եւ երկրի նախկին ներկայացուցիչը ՄԱԿ-ում՝ Հալեդ ալ Յամանին հայտարարել է, որ «Անսար Ալլա» շարժման ապստամբ հուսիները համաձայնել են հակամարտության խաղաղ կարգավորման պայմանին՝ նշելով, որ ՄԱԿ-ը նրանցից համապատասխան ծանուցում է ստացել, փոխանցում է «ՌԻԱ Նովոստի»-ն։
Ալ Յամանին արտգործնախարար է նշանակվել մայիսի 23-ին՝ փոխարինելով 2015 թվականից այդ պաշտոնը զբաղեցրած Աբդել Մալիք ալ Մահլյաֆիին։
«Ես ենթադրում եմ, որ ապստամբները այսօր դժվար իրավիճակում են հայտնվել, եւ նրանք համաձայնել են աշխատել կարգավորման հարցով առաջարկություններով»,-հայտնել է նախարարը «Ալ Արաբիա» հեռուստաալիքի հետ հարցազրույցում։
Ալ Յամանին նշել է, որ հուսիները պատրաստակամություն են հայտնել թողել գրավված քաղաքը եւ հանձնել զենքը։ Այլ մանրամասներ նա չի հայտնել։
Նշենք, որ հուսիների վերահսկողության տակ է մնում մայրաքաղաք Սանան եւ այլ շրջաններ, որոնց համար նրանց դեմ պայքար է մղում կառավարական բանակը Սաուդյան Արաբիայի կողմից գլխավորվող արաբական երկրների կոալիցիայի աջակցությամբ։
