Ուկրաինայի նախագահ Պյոտր Պորոշենկոն ԱՄՆ պետքարտուղար Մայք Պոմպեոյի հետ հեռախոսազրույցի ժամանակ հայտարարել է Ռուսաստանի վրա ճնշում գործադրելու կարեւորության մասին՝ ուկրաինացի պատանդներին ազատելու համար: Այս մասին նշված է Ուկրաինայի նախագահի մամուլի ծառայության հաղորդագրության մեջ:
Պորոշենկոն ամերիկյան կողմին շնորհակալություն է հայտնել Ուկրաինային հակատանկային Javelin հրթիռային համալիրներ տրամադրելու համար: Զրուցակիցները քննարկել են նաեւ անվտանգության ու պաշտպանության ոլորտում համագործակցության ամրապնդման հարցը: Կողմերը խոսել են «Հյուսիսային հոսք-2» նախագծի իրականացման դեպքում հնարավոր վտանգների մասին եւ դիրքորոշումները համաձայնեցրել են Հատուկ քննչական հանձնաժողովի եզրակացությունների հրապարակման ենթատեքստում, որը քննում է 2014 թվականին Դոնբասի երկնքում ՄՆ17 չվերթի կործանումը: Նրանք խոսել են Ռուսաստանի դեմ պատժամիջոցային քաղաքականության շարունակման կարեւորության մասին:
«Պետության ղեկավարը տեղեկացրել է Ուկրաինայում բարեփոխումների ընթացքի մասին՝ Արժույթի միջազգային հիմնադրամի հետ համագործակցության համատեքստում, այդ թվում՝ արդյունավետ հակակոռուպցիոն ենթակառուցվածքի ստեղծման ընթացքի մասին»,- նշել են Ուկրաինայի նախագահի աշխատակազմից: Ուկրաինայի նախագահը Պոմպեոյին հրավիրել է Ուկրաինա այցելել:
Ապրիլի 26-ին ԱՄՆ Սենատը Պոմպեոյին հաստատել էր պետքարտուղարի պաշտոնում: Մայիսին նա հայտարարել էր, որ ԱՄՆ-ն պետք է «շարունակի ճնշումը, որպեսզի «Հյուսիսային հեսք-2»-ը դադարեցնի»: