Գյումրիից 10 ընտանիք նոր բնակարան է ստացել: Այսպիսով  կիսաքանդ տնակներում, վագոններում ապրող 69 մարդ, որոնցից 39 երեխաներ են, նոր տներ եւ բնակարաններ տեղափոխվեցին:

«Շատ շնորհակալություն: Ես արդեն իմ մասին չէի մտածում: Միակ բանը, որ ուզում էի, որ գոնե իմ երեխաները իրենց գլխին ծածկ ունենային»,- ասել է ընտանիքներից մեկի հայրը:

«Ամռանը մեր տներում շատ խոնավ է, ձմռանը շատ ցուրտ: Մենք վառարանը ամբողջ օրը վառում ենք: Ամենասարսափելին այն է, որ առաստաղը կարող է ուղղակի փլվել երեխաների, ծերերի վրա: Մենք կորցրել էինք հույսը, արդեն ոչնչի չենք հավատում»,- ասել են տնակների բնակիչները:

Գյումրիում բարաքները եւ վագոնները արտառոց երեւույթ են: Հետնախորշերը եւ հյուղակները Հայաստանի երբեմնի մշակութային կենտրոնի առօրյա կյանքի խորհրդանիշներն են: Վերջին տվյալներով, անմարդկային պայմաններում է ապրում ավելի քան 500 ընտանիք:

1988 թվականի Սպիտակի երկրաշարժից հետո տներից զրկված մարդկանց բնակարանի հարցը լուծելու խնդրում օգնել է «Տաշիր» ընկերությունների խմբի հիմնադիր Սամվել Կարապետյանի դուստրը՝ «Տաշիր»-ի փոխնախագահ Տաթեւիկ Կարապետյանը:

28-ամյա բիզնես լեդին արդեն երկրորդ տարին անընդմեջ իր ծննդյան օրը Գյումրիի անտուն ընտանիքներին բնակարաններ է նվիրում: Անցյալ տարի նա բնակարաններ եւ տներ նվիրեց 8 ընտանիքներին:

Հայաստանում 1988 թվականի երկրաշարժի կապակցությամբ երկրում տարբեր պետական նախագծեր են կատարվել, այդ թվում տարերքից տուժածներին կացարանով ապահովելու ծրագրեր:

2017-ին կառավարությունն ավարտեց տուժած քաղաքային ընտանիքներին բնակարաններով ապահովելու ծրագիրը, սակայն գյուղական բնակավայրերում՝ հիմնականում Լոռու, Շիրակի եւ Արագածոտնի մարզերում բնակվող 542 ընտանիքների հարցը նախատեսվում է լուծել մինչեւ 2020 թվականը:

 2018 թվականին այս ծրագիրը իրականացնելու համար պետական բյուջեից պետք է հատկացվի մոտ կես միլիարդ դրամ (մոտ մեկ միլիոն դոլար): Մինչեւ 2008 թվականը բնակարաններ ստացել են երկրաշարժից տուժած 60 հազար ընտանիքներ: 2008 թվականից պետական ծրագրով 4839 ընտանիք ապահովվել է բնակարաններով:

«Գյումրին առանց տնակների» հիմնադրամի տվյալների համաձայն, այսօր քաղաքում կա 2983 տնակ, որոնցից 2399-ը բնակեցված է: