Ոչ մի պաշտոն հավերժ չէ, եւ ցանկացած պաշտոնյա ամեն օր պետք է պատրաստ լինի հեռանալ։ Այս մասին NEWS.am-ի թղթակցի հետ զրույցում ասաց Վայոց ձորի մազրպետ ԲՀԿ-ական Սերգեյ Բագրատյանը՝ պատասխանելով հարցին, թե մտահոգություն չունի՞, որ կադրային փոփոխությունները կհասնեն նաեւ իր ղեկավարած մարզ։
«Մտածելով դրա մասին՝ կխանգարես աշխատանքիդ, ավելի լավ է մտածես քեզ հանձնարարված աշխատանքը ճիշտ կազմակերպելու, շատ նախաձեռնողականություն ցուցաբերելու մասին»,-հայտարարեց Բագրատյանը՝ հավելելով. «Եթե քաղաքական կոնյուկտուրան պահանջում է, որ դու այլեւս չաշխատես, ապա պետք է ենթարկվել այդ պահանջին։ Չեմ կարծում, որ որեւէ մեկը պետք է դրանից դժբախտություն սարքի, քանի որ ոչ ոք էլ չգիտեր, որ ինքը պետք է նախարար աշխատի, կամ՝ մարզպետ»։
Վայոց ձորի մարզպետը հայտարարեց նաեւ, որ եթե իր պաշտոնանկության հարցը օրակարգում լինի, ապա այդ մասին ԲՀԿ ղեկավար Գագիկ Ծառուկյանը պետք է տեղյակ պահած լիներ իրեն։ «Սակայն նա այդ մասին ինձ ոչինչ չի ասել։ Նաեւ՝ հանրապետության վարչապետն ու փոխվարչապետն այդ մասին ոչինչ չեն ակնարկել։ Մենք ամեն շաբաթ հանդիպում ենք հրավիրվող խորհրդակցություններում։ Մեր մարզը բոլոր ցուցանիշներով 1-3-րդ տեղերում է. ե՜ւ հարկահավաքությամբ, ե՜ւ մարզի զարգացման ծրագրերի, ե՜ւ արդյունաբերության ոլորտում կատարված աշխատանքների եւ մնացած բոլոր դաշտերում»,- ասաց նա:
Սերգեյ Բագրատյանի խոսքով՝ պաշտոնանկություների խնդիրներն առաջանում են «քաղաքական վայրիվերումների» արդյունքում։ «Մեր մարզում կարծեք ստատուս քվո կա։ Իմ տեղակալը ՀՀԿ մարզխորհրդի տեղակալն է, իսկ ես ԲՀԿ մարզխորհրդի նախագահը։ Նա, փառք Աստծո, 70-ամյա խելացի, փորձառու քաղաքական գործիչ է եւ երբեք թույլ չի տա, որ կոնֆլիկտային իրավիճակներ ստեղծվեն»։ Վայոց ձորի մարզպետը հավաստիացրեց, որ իր ղեկավարած մարզում ՀՀԿ-ԲՀԿ հակամարտություն գոնե մարզպետի եւ նրա տեղակալի մակարդակում չկա եւ իրենք ամենաօրյա ջերմ աշխատանքի մեջ են։
Հարցին, թե ի՞նչ գնահատական կտա իր պաշտոնավարման անցած ամիսներին, մոտ կես տարի առաջ մարզպետ նշանակված Բագրատյանը պատասխանեց, թե իր աշխատանքը գնահատում է բավարարի եւ լավի արանքում։
