Երեւանում հունիսի 7-ին մեկնարկել է բրիտանա-հայկական բիզնես համաժողովը, որը կազմակերպել է Հայաստանում Բրիտանիայի դեսպանատունը՝ Հայ-բրիտանական առեւտրի պալատի համագործակցությամբ:
Համաժողովին մասնակցում են բրիտանական 10 ընկերությունների ներկայացուցիչներ, որոնք Հայաստան են ժամանել Մեծ Բրիտանիայի վարչապետի՝ Հայաստանում եւ Վրաստանում առեւտրի ու ներդրումների հարցերով հանձնակատար Մարկ Փրիթչարդի հետ: Բրիտանական ընկերությունների ներկայացուցիչները հայկական ընկերությունների ավելի քան 100 ներկայացուցիչների հետ կքննարկեն ներդրումների եւ առեւտրի ոլորտում երկկողմ համագործակցության հնարավորությունները:
Համաժողովը բացելիս Հայաստանում Բրիտանիայի դեսպան Ջուդիթ Ֆարնուորթը նշեց, որ Բրիտանիան պատրաստ է աջակցել Հայաստանում բարեփոխումներին, որպեսզի Հայաստանում բիզնես կլիման ավելի կանխատեսելի դարձնի:
Ելույթ ունեցավ նաեւ Հայաստանի առաջին փոխվարչապետ Արարատ Միրզոյանը: Նա, մասնավորապես, նշեց Հայաստանի եւ Բրիտանիայի միջեւ տնտեսական եւ առեւտրային հարաբերությունների չօգտագործված պոտենցիալի մասին: «Այսօր իրական հնարավորություններ են ստեղծվել այդ պոտենցիալն օգտագործելու համար»,- հայտարարեց նա՝ մասնակիցներին ցանկանալով իրական պայմանավորվածությունների հասնել իրական, այլ ոչ արարողակարգային բանավեճերի արդյունքում:
Մարկ Փրիթչարդն, իր հերթին, շեշտեց, որ ուրախ է այն հանգամանքով, որ Հայաստանի նոր կառավարությունը կենտրոնացել է կոռուպցիայի դեմ պայքարի վրա, քանի որ հենց կոռուպցիան է այն գործոնը, որը բիծ է թողնում ցանկացած երկրի հեղինակության վրա, այդ թվում՝ նաեւ Բրիտանիայի:
Հայ-բրիտանական առեւտրի պալատի նախագահ Արաքսյա Մարտիրոսյանը շեշտեց, որ վերջին շրջանում Հայաստանի ձեռք բերած պայմանավորվածությունները, ինչպես նաեւ Իրանի հետ հարաբերությունները երկիրը գրավիչ են դարձնում արտասահմանյան ներդրողների, այդ թվում՝ բրիտանական ընկերությունների համար:
Համաժողովի շրջանակում ծրագրված է բանավեճ, ինչպես նաեւ բրիտանացի եւ հայ գործարարների մի շարք հանդիպումներ: