Ստոկհոլմի դատարանը Ուզբեկստանի քաղաքացի Ռախմաթ Ակիլովին դատապարտել է ցմահ ազատազրկման՝ նրան մեղավոր ճանաչելով ահաբեկչության, հինգ մարդու սպանության եւ մահափորձի 119 դեպքի համար, փոխանցում է DW- ն:
Ավելի վաղ 40-ամյա Ակիլովը խոստովանել էր, որ 2017 թվականի ապրիլի 7-ին շվեդական մայրաքաղաքի կենտրոնական առեւտրային փողոցում բեռնատար ավտոմեքենայով մխրճվել է ամբոխի մեջ:
Դատարանում Ակիլովը նշել է, որ ահաբեկչական հարձակումից որոշ ժամանակ առաջ միացել էր «Իսլամական պետություն» ծայրահեղական կազմակերպությանը: Իր գործողությունները նա բացատրել է շվեդական իշխանություններին «ԻՊ»-ի դեմ պայքարից հրաժարվել ստիպելու ցանկությամբ, ընդ որում, կազմակերպությունը պատասխանատվություն չի ստանձնել այդ հարձակման համար:
The Local-ի տվյալներով` Շվեդիայում ցմահ ազատազրկման դատապարտված մարդիկ բանտում անցկացնում են միջինում 16 տարի, ընդ որում, ազատազրկման առավելագույն ժամկետը 34 տարի է: Ազատությունից հետո Ակիլովը կարտաքսվի Շվեդիայից: