Հայաստանի եւ Ռուսաստանի միջեւ երկխոսության մակարդակում հրաշալի փոխըմբռնում կա։ Այս մասին «Կոմերսանտ» թերթին տված հարցազրույցում հայտարարել է ՀՀ արտաքին գործերի նախարար Զոհրաբ Մնացականյանը՝ պատասխանելով հարցին, թե կարելի է արդյոք «Ռոսնեֆթի» մամուլի քարտուղար Միխայիլ Լեոնտեւի հետ կապված միջադեպը սպառված համարել, երբ վերջինս վիրավորական արտահայտություններ էր թույլ տվել Հայաստանի մասին ապրիլյան իրադարձությունների ժամանակ։
«Մենք բացարձակապես հստակ ենք եղել մեր ձեւակերպումներում, որ, առաջին հերթին, արտաքին քաղաքական կուրսի կայունությունն ու հետեւողականությունը անխախատ են մնում։ Եվ նաեւ, որ այդ կուրսում Ռուսաստանի հետ հարաբերություններն ունեն հատուկ, վառ արտահայտված տեղ։ Մենք առաջ ենք շարժվում մեր հարաբերություններում հենց այդ ձեւակերպման հիմքի վրա։ Սա կանխադրույթ է։
Ինչ վերաբերում է այլ գնահատականներին, գուցե պետք չէ զարմանալ, բայց շատ ցավոտ են դրանք։ Մյուս կողմից, մենք կշարունակենք օգնել փորձագիտական հանրությանն ավելի պարզ տեսնել այն, ինչ կատարվում է հայ հասարակությունում»,–նշել է Մնացականյանը։
ՀՀ ԱԳ նախարարը հավաստիացրել է նաեւ, որ վերջին իրադարձությունները խորը ներքաղաքական գործընթաց էին, որոնք չունեին ոչ մի աշխարհաքաղաքական երանգ։ «Դա առավել քան հստակ ասվել է, ցույց է տրվել։ Եթե փորձագիտական հանրությունը դա դեռ չի ընկալել, ապա ժամանակը դա անպայման ցույց կտա, եւ նրանք կկարողանան իրավիճակն ընկալել ավելի հստակ։ Չնայած մենք կանենք ամեն բան, որ դրա ընկալումն արագ տեղի ունենա։ Հնարավոր է, գրավիչ է զուգահեռներ անցկացնել տարատեսակ այլ իրավիճակների հետ, գուցե դրանում էլ կայանում է փորձագիտական հանրության աշխատանքը։ Սակայն եւս մեկ անգամ ընդգծում եմ՝ այն, ինչ տեղի ունեցավ Հայաստանում խորը ներքաղաքական գործընթաց էր՝ առանց աշխարհաքաղաքական երանգի։
Նա նաեւ հիշեցրել է, որ Միխայիլ Լեոնտեւը նամակ է հղել ՀՀ վարչապետին պաշտոնապես ներողություն խնդրելով։ «Սակայն ինձ համար կարեւոր է այս ամենից վեր լինելը։ Շատ ուշադրություն չդարձնել այն ամենին, ինչը մարդկային արժանապատվությունից ցածր է։ Ես չեմ ասում անտեսել, սակայն շատ ուշադրություն չդարձնել այն ամենին, որը չի համապատասխանում նորմալ, արժանապատիվ վարքագծին»,–ասել է նա։
