Սա մտահոգիչ եւ դատապարտելի հայտարարություն է, որը պետք է արժանանա ԵԱՀԿ Մինսկի խմբի համանախագահների խստագույնս դատապարտման։ Այս մասին այսօր՝ հունիսի 13-ին լրագրողների հետ զրույցում հայտարարեց Հայաստանի ԱԺ փոխխոսնակ Էդուարդ Շարմազանովը՝ մեկնաբանելով Ադրբեջանի խորհրդարանի առաջին փոխխոսնակի հայտարարությունը Ղարաբաղը ռազմական ճանապարհով «ազատագրելու» մասին։
«Եթե Ադրբեջանի Միլի մեջլիսի առաջին փոխխոսնակը շատ հստակ խոսում է պատերազմը վերսկսելու մասին, սա դատապարտելի է»,- հայտարարեց նա։
Շարմազանովի խոսքով՝ թող ոչ ոք չմտածի, որ Հայաստանում Արցախի միջազգային ճանաչման գործընթացում որեւէ քաղաքական ուժ հետընթաց կարձանագրի: «Ինչպես իշխանությունում ենք պայքարել Արցախի հարցի արդարացի լուծման համար, այնպես էլ հիմա սատարելու ենք իշխանություններին բոլոր բանակցություններում, որ կարողանան լավագույնս պաշտպանել Արցախը»,- շեշտեց նա։
ԱԺ փոխխոսնակի պնդմամբ՝ Արցախի եւ Հայոց ցեղասպանության հարցում իշխանություն-ընդդիմություն չկա։
Նշենք, որ ավելի վաղ Ադրբեջանի Միլի մեջլիսի առաջին փոխխոսնակ Զիյաֆետ Ասքերովը հայտարարել էր, թե Ադրբեջանն իրավունք ունի ազատագրելու «իր տարածքները» ռազմական ճանապարհով:
