Սեուլի ու Փհենյանի զինվորականները առաջին անգամ բանակցություններ են վարել վերջին 10 տարվա ընթացքում: Reuters-ի փոխանցմամբ՝ բանակցություններն ընթացել են սահմանամերձ Պանմունջո գյուղում՝ ապառազմականացված գոտում:
Ռազմական բանակցություններն իսկզբանե նախատեսված էին մայիսին, սակայն հետաձգվել էին, երբ Հյուսիսը չեղյալ էր հայտարարել նախատեսված բարձր մակարդակի հանդիպումը՝ որպես Հարավային Կորեայում ամերիկյան զորավարժությունների դեմ բողոքի նշան:
Վերջին անգամ Սեուլի ու Փհենյանի ռազմական բանակցությունները տեղի են ունեցել 2007 թվականին: Փհենյանի գլխավոր պատվիրակ Ան Իլ-սանը բանակցությունների ձգձգումը բացատրել է «որոշակի հանդիպակաց քամիներով»՝ հավելելով, որ երկու կողմերն էլ պետք է հաղթահարեն ապագա խոչընդոտները փոխըմբռնման եւ միջկորեական գագաթնաժողովի ոգու հիման վրա:
Սեուլի առաջատար բանակցող Կիմ Դո-գյունը հայտնել է, որ կողմերը կքննարկեն ռազմական լարվածության նվազեցման հնարավորությունները եւ նախարարական հանդիպման անցկացման ժամանակացույցը: Ակնկալվում է նաեւ, որ նրանք կքննարկեն զինվորականների միջեւ թեժ գծի ստեղծումը: