Ժամանակը Հայաստանի հեղափոխականների կողմը չէ. հարեւանների եւ ներքաղաքական խաղացողների կողմից ճնշումը կարող են զրոյացնել բողոքի շարժման նվաճումները, որը տապալեց վարչապետ Սերժ Սարգսյանի արմատացած ռուսամետ կառավարությունը: The Washington Post-ում հրապարակված իր հոդվածում այս մասին գրում է հայտնի լրագրող Դեվիդ Իգնատիուսը:
Նա գտնում է, որ հայ հեղափոխությունը ցույց տվեց, որ ժողովրդավարական բարեփոխումները կարող են հաջողության հասնել նույնիսկ Ռուսաստանի ստվերում: Երեւան կատարած այցի ընթացքում լրագրողը հանդիպել է վարչապետ Նիկոլ Փաշինյանի հետ: Նա այսպես է նկարագրում այդ հանդիպումը. «Փաշինյանը զրուցել է ինձ հետ ուրբաթ օրը մայրաքաղաքի կենտրոնում՝ Հանրապետության հրապարակում գտնվող իր մեծ գրասենյակում: Նա մի փոքր անհարմար էր իրեն զգում մուգ գույնի գործնական կոստյումի մեջ: Նրա սիրված կերպարը՝ գլխարկով տղան է, ով գլխավորեց մայրաքաղաքում ընթացող ցույցերը, որոնք ի վերջո կաթվածահար արեցին կառավարությունը»:
Իգնատիուսի խոսքով՝ այս հեղափոխության հրաշքը կայանում է նրանում, որ այն տեղի է ունեցել: Նա նշում է, որ Ռուսաստանը երկար ժամանակ աջակցել է Սարգսյանին, սակայն Կրեմլը չարգելափակեց Փաշինյանի գալը: Այնուամենայնիվ, Իգնատիուսը շեշտում է, որ Ռուսաստանը դեռ կարող է բարդացնել նոր Հայաստանի կյանքը: «Երեւանում անցյալ հանգստյան օրերին որոշ դիվանագետներից լսել եմ, որ եթե Մոսկվան հավատարմության նոր խոստումներ չստանա, ապա կարող է դադարեցնել զենքի վաճառքը, որից Հայաստանը կախված է Լեռնային Ղարաբաղի՝ հարեւան Ադրբեջանի հետ առճակատման հարցում: Ռուսաստանի հանդուրժողականությունը քաղաքական ազատականացման նկատմամբ կարող է գին դառնալ», - գրում է նա:
Ինչպես Փաշինյանը նշել է Իգնատիուսին տված հարցազրույցում, իր առաջնահերթ խնդիրը կոռուպցիայի դեմ պայքարն է, քանի «մարդկան արդեն զզվեցրել է այս իրավիճակը»: Փաշինյանի կառավարության ձգտումը տնտեսության առանցքային հատվածներում գերակայող մենաշնորհների տապալումն է. «Ազգային անվտանգության հարցով խորհրդական Արմեն Գրիգորյանը պարզաբանեց, որ Հայաստանի տնտեսություն է կարող է աճ գրանցել, եթե նոր կառավարությունը կարողանա թափանցիկ դարձնել իր գործունեությունը»:
«Ես չեմ պատրաստվում հրամաններ տալ դատավորներին, - պնդում է Փաշինյանը, սակայն զգուշացնում է, - Մենք կփորձենք պարզել եւ պատասխանատվության ենթարկել ամենակոռումպացվածներին»: Իգնատիուսը նշում է, որ անցյալից ազատվելու համար Փաշինյանից կպահանջվի իր ողջ իդեալիզմն ու էներգիան, ինչպես նաեւ՝ քաղաքական իշխանություն, որում նա այդքան էլ մեծ փորձ չունի: «Նա ինձ ասաց, որ «շատ հավանական է», որ ինքն արտահերթ խորհրդարանական ընտրությունները կանցկացնի հոկտեմբերին կամ նոյեմբերին՝ ապրիլյան ժամկետից շատ առաջ»,- նշում է հոտվածագիրը:
Ամփոփելով Երեւան կատարած այցը՝ Իգնատիուսը շեշտում է, որ Հայաստանի ճակատագիրն իրեն միեւնույն չէ, քանի որ հայկական արմատներ ունի: «Իմ այցի ժամանակ ես օգնեցի «Ավրորա» մրցանակաբաշխության կազմակերպման հարցում, որը ստեղծվել է մի շարք հայտնի հայերի կողմից, ովքեր պարգեւատրում են այլ երկրների իրավապաշտպաններին: Հայաստանն իր պատմության մեջ, այդ թվում նաեւ՝ ոչ հեռավոր խորհրդային ժամանակաշրջանում, ավելի շատ բան է տեսել, քան պարզապես վատ լուրերի չափաբաժինն է: Ուստի հաճելի էր տեսնել, թե ինչպես է Երեւանը փոփոխությունների ողբերգական պահից հետո դարձել ժպիտների քաղաք»,- եզրափակում է լրագրողը: