ՄԱԿ մարդու իրավունքների հարցերով գերագույն հանձնակատար Զեյդ Ռաադ ալ Հուսեյնը ԱՄՆ-ին կոչ է արել երկրի հարավային սահմաններին դադարեցնել միգրանտների ընտանիքներից երեխաներին բռնությամբ բաժանելու պրակտիկան: Այս մասին երկուշաբթի նա հայտարարել է ՄԱԿ Մարդու իրավնուքների հարցերով խոհրդի 38-րդ նստաշրջանի բացման ժամանակ:
«Ես խորապես մտահոգված եմ վերջերս ԱՄՆ-ում ընդունված օրենքներով, որոնցով երեխաներին պատժում են իրենց ծնողների արարքների համար: Վերջին 4 շաբաթում գրեթե 2 հազար երեխաներ բռնությամբ բաժանվել են իրենց ծնողներից»,- ասել է նա:
Նա վկայակոչել է Ամերիկյան մանկաբույժների ասոցիացիայի հայտարարությունը, որում երկրի հարավային սահմաններին ԱՄՆ գործողությունները համարվել են «երեխաների նկատմամբ պետության կողմից թույլատրված բռնություն»,- որը կարող է հանգեցնել երեխաների առողջության «անշտկելի վնասի»:
«Ես ԱՄՆ-ին կոչ եմ անում անհապաղ դադարեցնել երեխաներին ընտանիքներից բռնությամբ բաժանելու պրակտիկան եւ նվազագույնը վավերացնել Երեխաների իրավունքների մասին կոնվենցիան՝ այնպես անելու համար, որ ազգային օրենքների հիմքում դրվի երեխաների հիմնական իրավունքների պաշտպանությունը, նրանց վարչական կարգավիճակն ինչպիսին էլ լինի»,- շեշտել է նա:
ՄԱԿ Մարդու իրավունքների խորհրդի նստաշրջանը կընթանա հունիսի 18-ից հուլիսի 6-ը Ժնեւում: Սա գործող գերագույն հանձնակատարի համար վերջին նստաշրջանն է, նա իր պաշտոնը կլքի օգոստոսի վերջին: