«Զինված խմբի» գործով պաշտպաններն այսօր՝ հունիսի 22-ին, միջնորդեցին փոխել իրենց պաշտպանյալներ Խաչիկ Ավետիսյանի, Վլադիմիր Առաքելյանի եւ Հարություն Սարիբեկյանի խափանման միջոց կալանավորումը:
Երեւան քաղաքի ընդհանուր իրավասության դատարանի Կենտրոն եւ Նորք Մարաշի նստավայրում պաշտպանները նշեց, որ ամբաստանյալները կողմ են նաեւ այլընտրանքային խափանման միջոցի՝ գրավի կիրառմանը եւ պատրաստ են վճարել համապատասխան գումարը: Մեղադրանքի կողմը միջնորդություններին չառարկեց, միայն ազատամարտիկ Խաչիկ Ավետիսյանի մասով հայտարարեց, որ գրավի կիրառման դեպքում գումարը պետք է լինի 3 մլն դրամից ոչ պակաս:
Դատարանը հեռացավ խորհրդակցական սենյակ որոշում կայացնելու:
Նշենք, որ նախորդ նիստին այս գործով ազատ են արձակվել Էդուարդ Ներսիսյանը՝ Ապարը, ու «Հայրենիք եւ պատիվ» կուսակցության նախագահ Գառնիկ Մարգարյանը:
Հիշեցնենք, որ 2015թ. նոյեմբերի 25-ին Ազգային անվտանգության ծառայությունը Երեւանում վնասազերծել է ծանր հանցագործություն կազմակերպելու մեջ կասկածվող խմբի: ԱԱԾ-ի փոխանցմամբ՝ նոյեմբերի 25–ին ԱԱԾ աշխատակիցները ոստիկանության հետ համատեղ տան խուզարկության ընթացքում հայտնաբերվել են տարբեր տեսակի ինքնաձիգեր, ատրճանակներ, նռնականետեր (այդ թվում՝ «Մուխա» տեսակի), նռնակներ, պայթուցիկ նյութեր եւ պայթուցիկ սարքեր, կապի միջոցներ, փամփուշտներ, փամփշտակալներ, ռազմական հանդերձանք, այդ թվում՝ զրահաբաճկոններ: Խուզարկության պահին առանձնատանը, Արթուր Վարդանյանի գլխավորությամբ, հավաքված են եղել հանցավոր խմբակցության 9 անդամները, որոնք ձերբակալվել են, ապա կալանավորվել: Ավելի ուշ մեղադրանքներ առաջադրվեցին երկու տասնյակ անձանց: