Մալիշկայի գյուղապետ Մհեր Մովսիսյանն իրեն առաջադրված մեղադրանքը չի ընդունում: Այս մասին NEWS.am-ին ասաց Մովսիսյանի պաշտպան Լուսինե Մարտիրոսյանը:
Մովսիսյանը մեղադրվում է ընտրակաշառք բաժանելու համար 13 մլն դրամ ստանալու եւ բաժանելու մեջ: Ըստ ոստիկանության տարածած հաղորդագրության՝ գյուղապետը 2017թ.-ի ապրիլին կայացած խորհրդարանական ընտրություններից առաջ Աշոտ Արսենյանից ընտրակաշառք բաժանելու համար ստացել է 13 մլն դրամ:
«Մհեր Մովսիսյանի մեղադրանքում Աշոտ Արսենյանի անունը չկա: Նախաքննություն է ընթանում այժմ, ընդամենը կարող եմ ասել, որ Մովսիսյանն իրեն առաջադրված մեղադրանքը չի ընդունում»,- ասաց Լուսինե Մարտիրոսյանը:
Նշենք, որ ոստիկանությունը հայտնել էր նաեւ, որ Վայոց ձորի մարզի Մալիշկա համայնքի ղեկավարն ու որդին՝ համայնքի մարզադպրոցի տնօրենը, իրենց պաշտոնեական դիրքն օգտագործել են հակառակ ծառայության շահերի։ Մասնավորապես, 2016 թվականի հունվարի 1-ից մարզադպրոցում որպես բուժքույր են ձեւակերպել Մալիշկա համայնքի ղեկավարի կնոջը, որը նրանց գիտությամբ փաստացի աշխատանքի չի հաճախել եւ մինչեւ այս տարվա մայիս ստացել է 2 մլն դրամից ավելի աշխատավարձ։
Պարզվել է նաեւ, որ 2017 թվականին Մովսիսյանը եւ համայնքապետարանի գլխավոր հաշվապահը համայնքի 11 բնակչի անվամբ ձեւակերպել ու դուրս են գրել 410 հազար դրամ՝ որպես սոցիալապես անապահով ընտանիքների օգնություն։ Դուրս գրված գումարը յուրացվել է։
Այս մասով Մհեր Մովսիսյանին մեղադրանք չի առաջադրվել: Լուսինե Մարտիրոսյանը հայտնեց նաեւ, որ իր պաշտպանյալը շարունակում է աշխատել որպես համայնքի ղեկավար:
