Վերին Լարսի անցակետում մեքենաների հերթը կիսով չափ կրճատվել է։ Այս մասին NEWS.am–ի հետ զրույցում հայտարարել է Տրանսպորտի կապի եւ տեղեկատվական տեխնոլոգիաների փոխնախարար Արմեն Փամբուկչյանը։

 «Դրական փոփոխություն կա, ռուսական հատավածից կիսով չափ կրճատվել է հերթը, վրացական մասից՝ նույնպես»,– ասել է փոխնախարարը։

Անդրադառնալով  նախկին իշխանության ներկայացուցիչների այն կարծիքներին, թե դա պայմանավորված է հայ–ռուսական հարաբերությունների վատթարացմամբ, Արմեն Փամբուկչյանը վստահեցրեց, որ այն քաղաքական ենթատեքստ չունի։ Հերթը պայմանավորված է զբոսաշրջիկների հոսքով. «Հերթում գտնվող մեքենաների մոտ 20 տոկոսն է հայկական համարանիշներով, մնացածը ՌԴ քաղաքացիներ են, ՌԴ եւ այլ համարանիշներ են, դա ռուս–վրացական սահմանն է։ Նախորդ  ժամանակաշրջանի համեմատ այս տարի տուրիստների  հոսքը այդ ճանապարհով 40 տոկոսով աճել է։ Գոյություն ունի անցակետի որոշակի ստանդարտ, թե օրվա կտրվածքով քանի մեքենա են բաց թողնում։ 170 բեռնատար մեքենա, 3 հազար մարդատար մեքենա են բաց թողնում, բայց  օգոստոսի 5–ի դրությամբ իրենք 500 բեռնատար եւ 15 հազար մարդատար մեքենա են բաց թողել»։ 

Ինչ վերաբերում է բեռնափոխադրողների վնաս կրելուն, փոխնախարարն ասել է. «Վնասների մասով ոչ մի արձանագրում չունենք, ես դա ասում եմ Միջազգային փոխադրողների ասոցիացիայի տվյալների վրա հիմնվելով»։