Հայաստանի կենդանիների պաշտպանները կոչ են անում խստացնել կենդանիների նկատմամբ դաժան վերաբերմունքի համար պատիժը: Օգոստոսի 9-ին կայացած մամուլի ասուլիսի ժամանակ «Դինգո թիմ» ԲԸ ղեկավար Օվսաննա Հովսեփյանը հայտնեց, որ Հայաստանի Վարչական իրավախախտումների օրենսգրքով սահմանված տուգանքները նվազագույն են եւ կենդանիներին չեն կարող պաշտպանել դաժանության դրսեւորումներից: Այսպես՝ Վարչական իրավախախտումների օրենսգրքի 92-րդ հոդվածի համաձայն՝ կենդանիների նկատմամբ դաժան վերաբերմունքի, այդ թվում՝ խոշտանգման եւ սպանության համար տուգանք է նշանակվում ֆիզիկական անձանց համար նվազագույն աշխատավարձի 30-50-ապատիկի չափով, իսկ իրավաբանական անձանց համար՝ 80-100-ապատիկի չափով:
Կենդանիների պաշտպանների կարծիքով՝ անթույլատրելի է կենդանիների ծանակման համար քրեական պատասխանատվության բացակայությունը:
«Դինգո թիմի» ներկայացուցիչները վերջին շրջանում կենդանիներին դաժան վերաբերվելու մի քանի ահազանգ են ստացել: Օրինակ՝ Ճամբարակ գյուղի բնակիչը զվարճանում էր իր շներին մեքենային կապելով եւ ճանապարհներով երթեւեկելով: Նման կասկածելի «զվարճության» արդյունքն էին կենդանիների մոտ բազմաթիվ կոտրվածքները: «Սակայն հաշվի առնելով, որ նա գործազուրկ էր, տուգանքի գումարը կազմեց 5-10 հազար դրամ»,- նշեց Հովսեփյանը:
«Մենք օրենսդրական փոփոխությունների փաթեթ ենք մշակել, որի համաձայն նախատեսվում է բազմապատիկ մեծացնել տուգանքները, ինչպես նաեւ քրեական պատասխանատվություն սահմանել կենդանիներին դաժան վերաբերվելու համար»,- հավելեց նա:
Հովսեփյանը տեղեկացրեց, այդ լրացումներն ուղղված են նաեւ իրավիճակի կարգավորմանը, երբ տերերն ուղղակի փողոց են նետում ձանձրացրած ձեռնասուններին: Նրա խոսքով՝ տվյալ դեպքում խոսքն անգամ թանկարժեք ցեղատեսակների մասին է, որոնց արժեքը մի քանի հազար դոլար է կազմում:
«Կարճ ժամանակահատվածում մենք մայրաքաղաքի փողոցներում գտել ենք հասկի ցեղատեսակի 8 շուն եւ 3 բենգալյան կատու: Ցավոք, ոմանք տնային կենդանիներ են սկսում պահել նորաձեւությանը հետեւելով եւ չեն ցանկանում նրանց համար պատասխանատվություն կրել»,- շեշտեց նա:
