Նախկին քաղաքական գոծիչները, որոնք իշխանությունը բռնազավթել էին, պետք է քաղաքական պատասխանատվության ենթարկվեն: Այս մասին օգոստոսի 13-ին լրագրողների հետ հանդիպման ժամանակ ասաց Գերագույն խորհրդի նախկին պատգամավոր Ազատ Արշակյանը՝ մեկնաբանելով երկրորդ նախագահ Ռոբերտ Քոչարյանի կալանավորումը:
Նրա խոսքով՝ Նիկոլ Փաշինյանին չի հաջողվում քաղաքական դաշնակիցներ ձեւավորել, որոնք նախորդ տարիների քաղաքական գնահատականը կտային:
«Նախկին քաղաքական գործիչները ոչ միայն քաղաքական ծրագրեր ունեին, այլեւ գործել են քրեա-օլիգարխիկ համակարգի շրջանակում: Եվ, այո, այն ամենն, ինչ արվում է Ռոբերտ Քոչարյանի նկատմամբ, քաղաքական ենթատեքստ ունի»,- պարզաբանեց Արշակյանը:
Նախկին պատգամավորի կարծիքով՝ եթե նախկին նախագահին կալանավորում են, ապա դա արդեն քաղաքական գործընթաց է դառնում, իսկ մեղադրանքը ստանում է քաղաքական ենթատեքստ: Սական նա հավելեց, որ այս գործում կարող են լինել նաեւ քրեական հանգամանքներ, որոնք կարող են պարզել իրավապահ մարմինների աշխատակիցները:
Միաժամանակ, ըստ Արշակյանի, Հայաստանում եւ Ղարաբաղում որոշ կառույցների արձագանքը Ռոբերտ Քոչարյանի կալանավորմանը այս գործի հետ անմիջաբար կապված չէ:
«Սա ընդամենը անմեղության կանխավարկածը հարգելու փորձ է: Նրանք, ովքեր հայտարարում են, որ պետք է փոխել Ռոբերտ Քոչարյանի խափանման միջոցը, իրականում նրան այդ կերպ չեն պաշտպանում: Խնդիրն այն է, որ մեր երկրում կալանքի ինստիտուտը չարաշահվում է»,- եզրափակեց Արշակյանը:
