Ոստիկանությունն Արմավիրի մարզի Բաղրամյան համայնքում կոռուպցիոն դրսեւորման դրվագ է բացահայտել:
Ոստիկանության լրատվական ծառայությունից հայտնում են, որ պարզվել է՝ Բաղրամյան համայնքի ղեկավար Արա Սահարյանը չարաշահումներ է կատարել: 2017-18 թվականներին համայնքի ճանապարհները եւ ոռոգման ցանցը հիմնանորոգելու, ծառութուփ ձեռք բերելու եւ տնկելու, խաղահրապարակ կառուցելու համար բյուջեով նախատեսված գումարները հափշտակելու դիտավորությամբ, տարբեր տնտեսվարողների հետ նախնական համաձայնությամբ, կնքվել են աշխատանքն ամբողջ ծավալով կատարված լինելու վերաբերյալ կատարողական կեղծ ակտեր: Ընդհանուր առմամբ, յուրացվել է ավելի քան երկուսուկես միլիոն դրամ:
Բացի այս, պարզվել է, որ Սահարյանն անցած տարվա դեկտեմբերից երաժշտական դպրոցի տնօրեն է ձեւակերպել իր դստերը, իսկ այս հունվարից համայնքապետարանի հաշվապահի դստերը ձեւակերպել է նույն դպրոցի հաշվապահ: Երկուսն էլ աշխատանքի երբեւէ չեն հաճախել: Ընդհանուր վնասը 925 հազար դրամ է: Նախապատրաստվում են նյութեր: